கிளாம்பாக்கம் – செங்கல்பட்டு மெட்ரோ: விரிவான திட்ட அறிக்கை தயாரிக்க டெண்டர்!

சென்னை மற்றும் அதன் புறநகர்ப் பகுதிகளில் நாளுக்கு நாள் அதிகரித்து வரும் போக்குவரத்து நெரிசலுக்கு முற்றுப்புள்ளி வைக்கும் வகையிலும், பயணிகளின் தடையற்ற பயணத்தை உறுதி செய்யும் வகையிலும் சென்னை மெட்ரோ ரயில் நிறுவனம் (CMRL) பல்வேறு கட்ட விரிவாக்கப் பணிகளைத் தீவிரமாக மேற்கொண்டு வருகிறது. அதன் ஒரு பகுதியாக, தெற்கு புறநகர்ப் பகுதி மக்களின் நீண்ட நாள் கோரிக்கையான கிளாம்பாக்கத்தில் இருந்து செங்கல்பட்டு வரையிலான மெட்ரோ ரயில் விரிவாக்கத் திட்டத்தை விரைவுபடுத்த அதிகாரிகள் களமிறங்கியுள்ளனர்.

கிளாம்பாக்கம் கலைஞர் நூற்றாண்டு பேருந்து முனையத்தில் இருந்து செங்கல்பட்டு வரை மெட்ரோ ரயில் பாதையை நீட்டிப்பது தொடர்பாக, விரிவான திட்ட அறிக்கை (Detailed Project Report – DPR) தயாரிப்பதற்காகச் சென்னை மெட்ரோ ரயில் நிறுவனம் தற்போது அதிகாரப்பூர்வ ஒப்பந்தப்புள்ளி (Tender) கோரியுள்ளது. தேர்ந்தெடுக்கப்படும் தனியார் நிறுவனம், இப்பாதையில் அமைக்கப்பட வேண்டிய மெட்ரோ நிலையங்களின் எண்ணிக்கை, வழித்தடம், நிலம் கையகப்படுத்துதல் மற்றும் திட்டத்திற்கான தோராய மதிப்பீட்டுச் செலவு உள்ளிட்ட அனைத்து அம்சங்களையும் ஆராய்ந்து விரிவான அறிக்கையைச் சமர்ப்பிக்கும்.

ஏற்கனவே சென்னை விமான நிலையத்தில் இருந்து தாம்பரம் வழியாகக் கிளாம்பாக்கம் பேருந்து முனையம் வரையிலான மெட்ரோ ரயில் வழித்தட நீட்டிப்பிற்கான விரிவான திட்ட அறிக்கை (DPR) தயாரிக்கப்பட்டு, மத்திய அரசின் இறுதி ஒப்புதலுக்காக அனுப்பி வைக்கப்பட்டுக் காத்திருப்பில் உள்ளது குறிப்பிடத்தக்கது. விமான நிலையம் – கிளாம்பாக்கம் திட்டத்திற்குத் தொடர்ந்து கிளாம்பாக்கம் – செங்கல்பட்டு வழித்தடமும் செயல்பாட்டுக்கு வரும் பட்சத்தில், தென் மாவட்டங்களில் இருந்து சென்னைக்கு வரும் பயணிகளுக்கும் செங்கல்பட்டு சுற்றியுள்ள தொழில்துறை ஊழியர்களுக்கும் அது மிகப்பெரிய வரப்பிரசாதமாக அமையும்.