அண்ணா பல்கலையில் ஆன்லைன் எம்பிஏ சேர்க்கை: ஆகஸ்ட் 23-ல் நுழைவுத் தேர்வு!

தமிழகத்தின் முன்னணித் தொழில்நுட்ப நிறுவனமான சென்னை அண்ணா பல்கலைக்கழகத்தின் தொலைதூரக் கல்வி மையம் (Centre for Distance and Online Education – CDOE) வழங்கி வரும் இணையவழி (Online) மற்றும் தொலைதூரக் கல்வி முறையிலான எம்பிஏ (MBA) பட்டப் படிப்புகளில் சேர விரும்புவோருக்கு முக்கிய அறிவிப்பு வெளியாகியுள்ளது. நடப்பு கல்வி ஆண்டிற்கான ஆன்லைன் எம்பிஏ படிப்பில் சேர விரும்பும் தகுதியான மாணவர்களிடமிருந்து விண்ணப்பங்கள் தற்போது வரவேற்கப்பட்டு வருகின்றன.

இப்படிப்பிற்கு விண்ணப்பிக்க விரும்புவோர் வரும் ஆகஸ்ட் மாதம் 17ஆம் தேதிக்குள் தங்களது ஆன்லைன் விண்ணப்பப் பதிவை முழுமையாக நிறைவு செய்ய வேண்டும் எனத் தெரிவிக்கப்பட்டுள்ளது. ஆன்லைனில் விண்ணப்பிக்கும் மாணவர்களுக்கு வரும் ஆகஸ்ட் மாதம் 23ஆம் தேதி அண்ணா பல்கலைக்கழகம் சார்பில் ஆன்லைன் முறையிலான நுழைவுத் தேர்வு (Entrance Exam) நடத்தப்பட உள்ளது.

இந்த எம்பிஏ படிப்பில் சேர்க்கை பெற நுழைவுத் தேர்வில் தேர்ச்சி பெறுவது கட்டாயமாக்கப்பட்டுள்ளது. நுழைவுத் தேர்வில் மாணவர்கள் எடுக்கும் மதிப்பெண்கள் மற்றும் தகுதியின் அடிப்படையில் மட்டுமே மாணவர் சேர்க்கை நடைபெறும். இது குறித்த கூடுதல் விவரங்கள், தகுதி வரம்புகள் மற்றும் ஆன்லைனில் விண்ணப்பிக்கும் முறைகளை அறிந்து கொள்ள அண்ணா பல்கலைக்கழகத்தின் அதிகாரப்பூர்வ இணையதமான https://onlinecde.annauniv.edu/ என்ற முகவரியைப் பார்வையிடலாம்.