தமிழ்நாடு பட்ஜெட் 2026-27: மாணவர்கள் & இளைஞர்களுக்கான முக்கிய அறிவிப்புகள்!
தமிழ்நாடு பட்ஜெட் 2026-27-ல் பள்ளி மாணவர்கள் மற்றும் இளைஞர்களின் எதிர்கால வளர்ச்சிக்கும் வேலைவாய்ப்பிற்கும் முக்கியத்துவம் அளித்து நிதி ஒதுக்கப்பட்டுள்ளது. பள்ளிக்கல்வித் துறைக்கு ₹44,527 கோடி ஒதுக்கப்பட்டுள்ளதுடன், 6 முதல் 8-ஆம் வகுப்பு வரை காமராஜர் காலை உணவுத் திட்டம் விரிவாக்கம் செய்ய ₹710 கோடி நிதி ஒதுக்கப்பட்டுள்ளது. அரசுப் பள்ளி சுகாதாரத்திற்கு ‘சூப்பர் கிளீன், சூப்பர் கேம்பஸ்’ திட்டத்திற்கு ₹129 கோடியும், 11-ஆம் வகுப்பு மாணவர்களுக்கு இலவச மிதிவண்டி மற்றும் தலைக்கவசத்திற்கு ₹277 கோடியும் ஒதுக்கப்பட்டுள்ளது. மேலும், ‘பெருந்தலைவர் காமராஜர் மாதிரிப் பள்ளிகளுக்கு’ ₹125 கோடி, 300 பள்ளிகளில் நவீன அறிவியல் ஆய்வகங்கள் மற்றும் ‘TN Spark’ மூலம் 2,200 பள்ளிகளில் AI, ரோபாட்டிக்ஸ் பயிற்சிகளும் அறிமுகப்படுத்தப்பட்டுள்ளன.
உயர்கல்வித் துறைக்கு ₹8,393 கோடி ஒதுக்கப்பட்டுள்ள நிலையில், கல்லூரி மாணவர்களுக்கு ‘வெற்றி லேப்டாப் திட்டம்’ மூலம் ₹2,000 கோடி ஒதுக்கப்பட்டுள்ளது. இளைஞர்களின் வேலைவாய்ப்பை உயர்த்த ‘வெற்றி திறன் பயிற்சித் திட்டம்’, உதவித்தொகையுடன் கூடிய தொழிற்பயிற்சிகள் (Internship) மற்றும் 22,500 பேருக்குத் தொழில் பழகுநர் பயிற்சிகள் அறிவிக்கப்பட்டுள்ளன. மாணவர்களின் தங்குமிட வசதிக்காக ₹3,200 கோடியில் 200 புதிய விடுதிகள் கட்டும் ‘TN-SUDAR’ திட்டமும் பட்ஜெட்டில் இடம்பெற்றுள்ளது.
