KH x RK: அதிரடி ரெட்ரோ ஸ்வாக்!

தமிழகத்தின் இரு பெரும் திரையுலக ஜாம்பவான்களான ரஜினிகாந்தும் கமல்ஹாசனும் மீண்டும் இணையும் புதிய மெகா திரைப்படத்தை, இன்பநிதி தயாரிக்கவுள்ளதாக அதிகாரப்பூர்வ அறிவிப்பு வெளியாகியுள்ளது.

தமிழ் திரையுலகின் இரு துருவங்களான ரஜினிகாந்தும் கமல்ஹாசனும் பல ஆண்டுகளுக்குப் பிறகு மீண்டும் ஒரே படத்தில் இணையவுள்ளனர். கமல்ஹாசன் தயாரிப்பில், சிபி சக்கரவர்த்தி இயக்கத்தில் ரஜினி தனது 173-வது படத்தில் நடிக்கவிருக்கும் நிலையில், இந்தப் புதிய மெகா கூட்டணி குறித்த அறிவிப்பு வெளியாகியுள்ளது. இப்படத்தை தமிழக முதலமைச்சர் மு.க.ஸ்டாலினின் பேரனும், துணை முதலமைச்சர் உதயநிதியின் மகனுமான இன்பநிதி பிரம்மாண்டமாகத் தயாரிக்கவுள்ளார்.

இப்படத்திற்காக ரஜினி மற்றும் கமல் ஆகிய இருவருமே சம்பளம் வாங்காமல், லாபத்தில் பங்கு (Profit Sharing) என்ற அடிப்படையில் ஒப்பந்தம் செய்யப்பட்டுள்ளதாகத் தெரிகிறது. நேற்று இரவு ரெட் ஜெயண்ட் மூவிஸ் வெளியிட்ட அறிவிப்பைத் தொடர்ந்து, இப்படத்தின் அதிரடி புரோமோ வீடியோ நாளை மதியம் 12.07 மணிக்கு வெளியாகிறது. ரெட்ரோ ஸ்டைலில் வெளியான புதிய போஸ்டர் இணையத்தில் வைரலாகி வரும் நிலையில், இப்படத்தின் இயக்குநர் யார் என்ற ரகசியம் மட்டும் இன்னும் அதிகாரப்பூர்வமாக வெளிப்படுத்தப்படவில்லை.