மெத்தையில் திரும்பி படுத்தபோது எலும்பு முறிவு! – அதிர்ச்சி சம்பவம்…
சீனாவின் செங்டு மாகாணத்தில் 48 வயது பெண்மணி ஒருவர், மெத்தையில் திரும்பி படுத்தபோது எலும்பு முறிவு ஏற்பட்ட சம்பவம் அதிர்ச்சியை ஏற்படுத்தியுள்ளது.
சூரிய ஒளி பட்டால் தோல் கருப்பாகி விடும் என்ற பயத்தில் பல ஆண்டுகளாக வெயிலை முழுமையாகத் தவிர்த்ததால், இவருக்கு கடுமையான வைட்டமின் டி குறைபாடு ஏற்பட்டு எலும்புகள் வலுவிழந்ததாக மருத்துவர்கள் தெரிவித்துள்ளனர்.
செங்டு நகரில் உள்ள சின்டு மருத்துவமனையின் அவசர சிகிச்சைப் பிரிவு மருத்துவர் லாங் ஷுவாங் இந்த சம்பவத்தைப் பகிர்ந்து, “இந்தப் பெண்மணி சிறு வயது முதலே சூரிய ஒளியைத் தவிர்த்து வந்தார். வெளியே செல்லும்போது ஒருபோதும் குட்டை ஆடைகளை அணியாமல், உடலை முழுவதுமாக மறைத்து வந்தார்,” என்று கூறினார். இதன் விளைவாக, வைட்டமின் டி குறைபாடு ஏற்பட்டு, எலும்பு முறிவு மற்றும் ஆஸ்டியோபோரோசிஸ் போன்ற பிரச்சனைகள் உருவாகியுள்ளன.
வைட்டமின் டி, உடலில் கால்சியத்தை உறிஞ்சுவதற்கும், எலும்புகளை வலுவாக வைத்திருப்பதற்கும் முக்கியமானது. சூரிய ஒளியே வைட்டமின் டி-யின் முதன்மை ஆதாரமாக உள்ளது. ஆனால், சீனாவில், குறிப்பாக பெண்களிடையே, தோல் நிறத்தை பராமரிக்க வெயிலைத் தவிர்க்கும் போக்கு அதிகரித்து வருவதாகவும், இது ஆரோக்கியத்திற்கு தீங்கு விளைவிக்கலாம் என்று மருத்துவர்கள் எச்சரிக்கின்றனர். குவாங்ஸோ மருத்துவ பல்கலைக்கழகத்தின் இரண்டாவது இணைப்பு மருத்துவமனையின் முதன்மை எலும்பு மருத்துவர் ஜியாங் சியாபிங், “முழுவதுமாக உடலை மறைத்து சூரிய ஒளியைத் தவிர்ப்பது ஆரோக்கியமற்றது. 30 வயதுக்கு மேல் ஒவ்வொரு ஆண்டும் 0.5 முதல் 1 சதவீதம் எலும்பு வலு குறைகிறது. வைட்டமின் டி குறைபாடு இதை மேலும் மோசமாக்குகிறது,” என்று கூறினார்.
இந்த சம்பவம், சீனாவில் சூரிய ஒளியைத் தவிர்க்கும் கலாசாரப் போக்கு குறித்து விவாதங்களைத் தூண்டியுள்ளது. பலர், அழகுக்காக முகமூடிகள், நீண்ட கையுறைகள் மற்றும் UV-பாதுகாப்பு ஆடைகளைப் பயன்படுத்துவது வழக்கமாக உள்ளது. இதுபோன்ற பழக்கங்கள் ஆஸ்டியோபோரோசிஸ், எலும்பு முறிவு மற்றும் பிற உடல்நலப் பிரச்சனைகளுக்கு வழிவகுக்கலாம் என்று மருத்துவர்கள் எச்சரிக்கின்றனர்.
மருத்துவர்கள், உடல் நிறத்திற்காக ஆரோக்கியத்தை பலிகொடுக்க வேண்டாம் எனவும், தினமும் 10-15 நிமிடங்கள் மிதமான சூரிய ஒளியைப் பெறுவது அவசியம் என்றும் அறிவுறுத்துகின்றனர். மேலும், வைட்டமின் டி நிறைந்த உணவுகள் அல்லது சப்ளிமென்ட்கள் மூலமாகவும் இந்த குறைபாட்டை சரிசெய்ய முடியும் என்று பரிந்துரைத்துள்ளனர்.
