தவறு செய்தால் உடனடி ஆக்ஷன் – அமைச்சர்களுக்கு முதல்வர் விஜய் வார்னிங்!

சென்னை தலைமைச் செயலகத்தில் இன்று நடைபெற்ற இரண்டாவது அமைச்சரவைக் கூட்டத்தில், தனது அமைச்சரவை சகக்களுக்கு மாண்புமிகு தமிழ்நாடு முதலமைச்சர் திரு. ச. ஜோசப் விஜய் அவர்கள் மிகவும் கடுமையான எச்சரிக்கைகளை விடுத்துள்ளார். தனது தலைமையிலான தமிழக அரசு மக்கள் மத்தியில் நூறு சதவீதம் வெளிப்படைத்தன்மை கொண்டதாக மட்டுமே செயல்பட வேண்டும் என்பதில் அவர் மிக உறுதியாக இருப்பதாகக் கூட்டத்தில் தெரிவித்துள்ளார்.

இக்கூட்டத்தின் போது ஊழலுக்கு எதிராகத் தனது கடுமையான நிலைப்பாட்டைப் பதிவு செய்த முதலமைச்சர் விஜய், ஊழல் புகார்களில் சிக்கும் அமைச்சர்கள் யாராக இருந்தாலும் அவர்கள் மீது எவ்விதத் தயக்கமுமின்றி உடனடியாக சட்டப்படியான நடவடிக்கைகள் பாயும் என்று எச்சரித்துள்ளார். மேலும், ஊழல் குற்றச்சாட்டுகள் நிரூபிக்கப்பட்டால் சம்பந்தப்பட்ட அமைச்சர்களின் பதவி உடனடியாகப் பறிக்கப்படும் என்றும் அவர் திட்டவட்டமாகக் கூறியுள்ளார்.

அரசின் நற்பெயருக்குக் களங்கம் விளைவிக்கும் வகையில் அமைச்சர்கள் தேவையில்லாத செயல்களில் ஈடுபடக் கூடாது என்றும் அறிவுறுத்தப்பட்டுள்ளது. குறிப்பாக, அமைச்சர்கள் அரசுப் பள்ளிகளுக்குச் சென்று அங்கு மாணவர்களுடன் இணைந்து சமூக வலைத்தளங்களில் ‘ரீல்ஸ்’ போடுவது போன்ற விளம்பர நோக்கிலான காரியங்களில் ஈடுபடக் கூடாது என முதல்வர் தடை விதித்துள்ளார். மக்கள் பணிகளில் மட்டுமே அமைச்சர்கள் முழுக் கவனம் செலுத்த வேண்டும் என அவர் கேட்டுக்கொண்டுள்ளார்.

இந்த எச்சரிக்கைகளின் இறுதியில், தவறு செய்பவர்கள் தனக்குத் தெரிந்தவர்களா அல்லது தெரியாதவர்களா என்று தான் பார்க்கப் போவதில்லை என்றும், தவறு என்று வந்துவிட்டால் தகுதி பாராமல் உடனடி ஆக்ஷன் எடுக்கப்படும் என்றும் முதலமைச்சர் விஜய் கறாராகத் தெரிவித்துள்ளார். முதல்வரின் இந்த அதிரடி மற்றும் கண்டிப்பான உத்தரவு தற்சமயம் தமிழக அரசியல் வட்டாரத்தில் பெரும் பரபரப்பை ஏற்படுத்தியுள்ளது.