ஒரு தொப்பி ரூ. 4.2 கோடியா?
கிரிக்கெட் ஜாம்பவான் டான் பிராட்மேன் இந்திய வீரருக்குப் பரிசளித்த வரலாற்றுச் சிறப்புமிக்க ‘பேக்கி கிரீன்’ தொப்பி, 70 ஆண்டுகளுக்குப் பிறகு ஆஸ்திரேலியாவில் நடைபெற்ற ஏலத்தில் சுமார் ரூ. 4.2 கோடிக்கு விற்பனையாகி உலக சாதனை படைத்துள்ளது.
ஆஸ்திரேலிய கிரிக்கெட் உலகின் ஈடுஇணையற்ற ஜாம்பவானாகக் கருதப்படும் சர் டான் பிராட்மேன் பயன்படுத்திய புகழ்பெற்ற ‘பேக்கி கிரீன்’ (Baggy Green) தொப்பி, ஆஸ்திரேலியாவின் கோல்ட் கோஸ்ட் பகுதியில் நடைபெற்ற ஏலத்தில் சுமார் 4,60,000 ஆஸ்திரேலிய டாலர்களுக்கு விற்பனையாகியுள்ளது. இதன் இந்திய மதிப்பு சுமார் 4.2 கோடி ரூபாய் ஆகும். கிரிக்கெட் வரலாற்றில் ஒரு வீரரின் தொப்பி இவ்வளவு பெரிய தொகைக்கு ஏலம் போயிருப்பது, உலக அளவில் விளையாட்டு ரசிகர்களிடையே பெரும் ஆச்சரியத்தை ஏற்படுத்தியுள்ளது.
இந்தத் தொப்பிக்கு ஒரு நெகிழ்ச்சியான இந்தியத் தொடர்பு இருப்பது இதன் கூடுதல் சிறப்பாகும். 1947-48 ஆம் ஆண்டு இந்திய அணி ஆஸ்திரேலியாவிற்குச் சுற்றுப்பயணம் மேற்கொண்டு டெஸ்ட் தொடரில் விளையாடியபோது, பிராட்மேன் இந்தத் தொப்பியை அணிந்து களமிறங்கினார். அந்தத் தொடரின் இறுதியில், இந்திய கிரிக்கெட் வீரரான ஸ்ரீரங்க வாசுதேவ் சோஹோனி மீது கொண்ட அன்பின் காரணமாக, அவருக்குத் தனது இந்தத் தொப்பியைப் பரிசாக வழங்கினார் பிராட்மேன்.
இந்த அரிய பொக்கிஷத்தை சோஹோனியின் குடும்பத்தினர் கடந்த 70 ஆண்டுகளுக்கும் மேலாக, மூன்று தலைமுறைகளாக மிகப்பத்திரமாகப் பாதுகாத்து வந்தனர். இந்தத் தொப்பியின் உட்புறத்தில் டான் பிராட்மேன் மற்றும் ஸ்ரீரங்க வாசுதேவ் சோஹோனி ஆகிய இருவரின் கையெழுத்துகளும் இடம்பெற்றுள்ளன; இது அதன் வரலாற்று மதிப்பை மேலும் உயர்த்தியுள்ளது. ஏழு தசாப்தங்களைக் கடந்து தற்போது ஏலத்திற்கு வந்த இந்தத் தொப்பி, கிரிக்கெட் வரலாற்றில் மிக உயர்ந்த விலைக்கு விற்பனையான பொருட்களில் ஒன்றாகப் பதிவாகியுள்ளது.
