20 ஓவர் உலகக் கோப்பை: பயிற்சி ஆட்ட விவரங்கள் அறிவிப்பு
உலகக் கோப்பை பயிற்சி ஆட்ட விவரங்களை ஐசிசி வெளியிட்டுள்ள நிலையில் சென்னையில் 4 போட்டிகள் நடைபெற உள்ளன
20 ஓவர் உலகக் கோப்பை கிரிக்கெட் போட்டிக்கான தகுதி மற்றும் முன்னேற்பாடுகளை உறுதி செய்யும் வகையில், சர்வதேச கிரிக்கெட் கவுன்சில் (ஐ.சி.சி.) பயிற்சி ஆட்டங்களுக்கான அதிகாரப்பூர்வ அட்டவணையை வெளியிட்டுள்ளது. இந்த அட்டவணையின்படி, இந்திய கிரிக்கெட் அணி தனது பயிற்சி ஆட்டத்தில் தென்ஆப்பிரிக்க அணியுடன் மோதுகிறது. இந்த விறுவிறுப்பான போட்டி வரும் 4-ந்தேதி நவிமும்பையில் உள்ள டி.ஒய். படேல் மைதானத்தில் நடைபெற உள்ளது. அதே நாளில், கொழும்பில் நடைபெறும் மற்றொரு ஆட்டத்தில் பாகிஸ்தான் அணி அயர்லாந்தை எதிர்கொள்கிறது. இதனைத் தொடர்ந்து 5-ந்தேதி நடைபெறும் போட்டிகளில் ஆஸ்திரேலிய அணி நெதர்லாந்துடனும், நியூசிலாந்து அணி அமெரிக்காவுடனும் பலப்பரீட்சை நடத்த உள்ளன.
தமிழக கிரிக்கெட் மைதானமான சென்னை சேப்பாக்கத்தில் மட்டும் மொத்தம் 4 பயிற்சி ஆட்டங்கள் நடைபெறுவது குறிப்பிடத்தக்கது. பிப்ரவரி 2-ந் தேதி இரவு 7 மணிக்கு நடைபெறும் ஆட்டத்தில் கனடா மற்றும் இத்தாலி அணிகள் விளையாடுகின்றன. பிப்ரவரி 3-ந் தேதி மாலை 5 மணிக்கு நேபாளம் – ஐக்கிய அரபு எமிரேட்ஸ் அணிகளும், பிப்ரவரி 5-ந்தேதி பிற்பகல் 3 மணிக்கு கனடா – நேபாளம் அணிகளும் களம் காண்கின்றன. சென்னையின் கடைசி பயிற்சி ஆட்டமாக பிப்ரவரி 6-ந்தேதி பிற்பகல் 3 மணிக்கு இத்தாலி மற்றும் ஐக்கிய அரபு எமிரேட்ஸ் அணிகள் மோத உள்ளன. உலகக் கோப்பை தொடர் தொடங்குவதற்கு முன்பாக அனைத்து அணிகளும் தங்களை தயார்படுத்திக் கொள்ள இந்த ஆட்டங்கள் முக்கிய வாய்ப்பாக அமையும்.
