வானில் நிகழும் அதிசயம்: 2026-ன் முதல் ‘ஓநாய் சூப்பர்மூன்’

புத்தாண்டு பிறக்கவுள்ள நிலையில், வானியல் ஆர்வலர்களுக்கு விருந்து படைக்கும் விதமாக 2026-ம் ஆண்டின் முதல் சூப்பர்மூன் (Supermoon) நிகழ்வு வரும் ஜனவரி 3-ம் தேதி நிகழவுள்ளது. இந்த ஆண்டின் முதல் பௌர்ணமியான இது, ‘ஓநாய் சூப்பர்மூன்’ (Wolf Supermoon) என்று அழைக்கப்படுகிறது. அன்றைய தினம் நிலவு பூமிக்கு மிக அருகில் வருவதால், வழக்கமான பௌர்ணமி தினங்களை விட நிலவானது அளவில் பெரியதாகவும், 30 சதவீதம் கூடுதல் பிரகாசத்துடனும் காட்சியளிக்கும். இந்த அரிய நிகழ்வு உலகெங்கிலும் உள்ள வான்வெளி ஆய்வாளர்கள் மற்றும் பொதுமக்களிடையே பெரும் எதிர்பார்ப்பை ஏற்படுத்தியுள்ளது.

இந்தக் குறிப்பிட்ட பௌர்ணமிக்கு ‘ஓநாய் சூப்பர்மூன்’ என்று பெயர் வந்ததற்குக் சுவாரஸ்யமான பின்னணி ஒன்று உள்ளது. பொதுவாக ஜனவரி மாத காலப்பகுதியில் கடும் பனிப்பொழிவு நிலவும். அந்த சமயத்தில் உணவிற்காக அலைந்து திரியும் ஓநாய்களின் ஊளைச் சத்தம் காடுகளில் மிக அதிகமாகக் கேட்கும் என்பதால், பழங்கால மக்கள் ஜனவரி மாதப் பௌர்ணமியை ‘ஓநாய் நிலவு’ (Wolf Moon) என்று அழைக்கத் தொடங்கினர். இந்தப் பெயர் காலப்போக்கில் நிலைத்துவிட்ட நிலையில், தற்போது நிலவு பூமிக்கு அருகில் வரும் ‘சூப்பர்மூன்’ நிகழ்வோடு இணைந்து இது கொண்டாடப்படுகிறது.

இந்த ஓநாய் சூப்பர்மூன் நிகழ்வை உலகின் அனைத்துப் பகுதிகளில் இருந்தும் பொதுமக்கள் வெறும் கண்களால் காண முடியும். வானம் மேகமூட்டமின்றித் தெளிவாக இருந்தால், ஜனவரி 3-ம் தேதி மாலை சந்திரன் உதிக்கும் நேரத்திலிருந்தே இந்த அழகிய காட்சியைக் கண்டு ரசிக்கலாம். இதைக் காண்பதற்குத் தனிப்பட்ட தொலைநோக்கிகள் (Telescope) தேவையில்லை என்றாலும், கேமராக்கள் மற்றும் பைனாகுலர்கள் மூலம் நிலவின் மேடு பள்ளங்களை இன்னும் துல்லியமாகப் பார்த்து ரசிக்க முடியும். 2026-ம் ஆண்டின் தொடக்கத்திலேயே நிகழும் இந்த வானியல் மாற்றம் ஒரு சிறப்பான தொடக்கமாகப் பார்க்கப்படுகிறது.