தமிழகத்தில் இன்று முதல் மழை தொடக்கம்! வானிலை ஆய்வு மையம் வெளியிட்ட முக்கிய அறிவிப்பு!
தமிழகத்தில் கடந்த சில வாரங்களாக நிலவி வந்த வறண்ட வானிலை முடிவுக்கு வந்து, இன்று (டிசம்பர் 24, 2025) முதல் மீண்டும் மழை பெய்யத் தொடங்கும் என்று சென்னை வானிலை ஆய்வு மையம் அறிவித்துள்ளது. தென்தமிழகம் மற்றும் அதனை ஒட்டியுள்ள பகுதிகளின் மேல் நிலவும் வளிமண்டல கீழடுக்கு சுழற்சி காரணமாக, இன்று முதல் அடுத்த நான்கு நாட்களுக்குத் தமிழகத்தின் பல்வேறு பகுதிகளில் லேசானது முதல் மிதமான மழை பெய்ய வாய்ப்புள்ளது. குறிப்பாக, கடலோரத் தமிழகம், டெல்டா மாவட்டங்கள், புதுச்சேரி மற்றும் காரைக்கால் பகுதிகளில் ஒருசில இடங்களில் இன்று மழை பெய்யக்கூடும் எனத் தெரிவிக்கப்பட்டுள்ளது.
கடந்த நவம்பர் இறுதியில் உருவான ‘டித்வா’ புயலால் பெய்த கனமழைக்குப் பிறகு, சுமார் மூன்று வாரங்களாகத் தமிழகம் முழுவதும் பனிப்பொழிவு அதிகரித்து வறண்ட வானிலையே காணப்பட்டது. தற்போது மீண்டும் மழை மேகங்கள் சூழத் தொடங்கியுள்ளதால், சென்னை உள்ளிட்ட கடலோர மாவட்டங்களில் வானம் மேகமூட்டத்துடன் காணப்படும். டிசம்பர் 25 முதல் 27-ம் தேதி வரை கடலோரப் பகுதிகளில் மழையின் பரவல் சற்று அதிகரிக்கக்கூடும் என்றும், அதே சமயம் உள் மாவட்டங்களில் பெரும்பாலும் வறண்ட வானிலையே நீடிக்கும் என்றும் கணிக்கப்பட்டுள்ளது.
