விக்கிப்பீடியாவுக்கு போட்டியாக Grokipedia!
எலான் மஸ்க் நிறுவிய X AI (எக்ஸ் ஏஐ), Grokipedia எனும் புதிய தகவல் களஞ்சிய தளத்தை அறிமுகப்படுத்தியுள்ளது. செயற்கை நுண்ணறிவு மூலம் இயங்கும் இந்த தளம், விக்கிபீடியாவுக்கு மாற்றாக இருக்கும் என நிறுவனம் தெரிவித்துள்ளது.
உலகம் முழுவதும் தகவல் தேடலுக்கு பொதுவாகப் பயன்படுத்தப்படும் விக்கிப்பீடியாவில் தற்போது 343 மொழிகளில் 65 மில்லியனுக்கும் அதிகமான கட்டுரைகள் உள்ளன. மாதந்தோறும் 16 பில்லியன் பார்வைகள் பெறும் உலகின் மிகப் பெரிய கட்டற்ற தகவல் களஞ்சியம் அதுவாகும்.
இந்நிலையில், அதே போன்று வடிவமைக்கப்பட்ட Grokipedia தளத்தை எக்ஸ் ஏஐ அறிமுகப்படுத்தியுள்ளது. இதில் பயனர்கள் தங்கள் தேவைக்கேற்ப தலைப்புகளை தேடலாம். எனினும், பல கட்டுரைகள் விக்கிப்பீடியாவில் உள்ள தகவல்களைப் பிரதியெடுத்தது போல உள்ளதாக ஒரு முன்னணி தொழில்நுட்ப செய்தி நிறுவனம் குறிப்பிட்டுள்ளது.
Grokipedia தளத்தை பயனர்கள் இலவசமாக பயன்படுத்த முடியும். இதில் தரப்பட்டுள்ள தகவல்களை சேர்க்கவும், திருத்தவும், நீக்கவும் பயனர்கள் கோரிக்கையை அனுப்பலாம். அந்த கோரிக்கையை நிறைவேற்ற முடியுமா, முடியாதா என்பதை Grok தளம் பின்னர் தெரிவிக்கும் என்றும் கூறப்பட்டுள்ளது.
