இந்திய மாணவர்களின் விசா விண்ணப்பங்களை நிராகரித்தகனடா அரசு! ஏன் தெரியுமா?
கனடாவில் படிக்க விரும்பும் இந்திய மாணவர்களுக்கு பெரிய அதிர்ச்சியாக, 2025 ஆகஸ்ட் மாதத்தில் 74 சதவீத கல்வி அனுமதி விசா விண்ணப்பங்களை கனடா அரசு நிராகரித்துள்ளது. இது கடந்த சில ஆண்டுகளில் ஏற்பட்ட மிக உயர்ந்த நிராகரிப்பு விகிதமாகும்.
வெளிநாடுகளில் உயர் கல்விக்காக மாணவர்கள் அதிகம் தேர்வு செய்யும் நாடுகளில் கனடா முதலிடத்தில் உள்ளது. கனடாவில் படிக்கும் சர்வதேச மாணவர்களில் 40% பேர் இந்தியர்கள். 2024-ஆம் ஆண்டு மட்டும் 1.88 லட்சம் இந்திய மாணவர்கள் அந்நாட்டில் சேர்க்கை பெற்றனர்.
ஆனால் கடந்த சில மாதங்களில் கனடாவில் வீடுகள் பற்றாக்குறை, உள்கட்டமைப்பு சவால்கள், உள்ளூர் மக்களுக்கு முன்னுரிமை அளிக்க வேண்டும் என்ற அரசியல் அழுத்தம் அதிகரித்தது. இதன் காரணமாக அரசு விசா விதிமுறைகளை கடுமையாக்கியுள்ளது.அதன் தாக்கமாக,விசா விண்ணப்பங்களில் 74% நிராகரிப்பு,கல்வி அனுமதி விண்ணப்பங்கள் 20,900 (2023) இலிருந்து 4,515 (2025) ஆக வீழ்ச்சி.
இந்த மாற்றங்கள் இந்திய மாணவர்களுக்கு பெரும் இழப்பை ஏற்படுத்தியுள்ளது.கடந்த மாதம் இந்தியாவுக்கு வந்த கனடா வெளியுறவு அமைச்சர் அனிதா ஆனந்த், “இந்திய மாணவர்களுக்கு வாய்ப்புகளை விரிவாக்க விரும்புகிறோம்” என்று கூறியிருந்தாலும், நடைமுறையில் கடும் கட்டுப்பாடுகள் தொடர்கின்றன.
இந்த நிலை தொடர்ந்தால், இந்திய மாணவர்களின் கனடா கல்வி கனவு மேலும் பாதிக்கப்படும் என்று கல்வி நிபுணர்கள் எச்சரிக்கின்றனர்.
