அசுர பலத்துடன் வரும் ஜிம்பாப்வே – சமாளிக்குமா வெஸ்ட் இண்டீஸ்?
தோல்வியே சந்திக்காமல் அசுர பலத்துடன் வலம் வரும் ஜிம்பாப்வே அணி, இன்று இரவு 7 மணிக்கு மும்பையில் நடைபெறும் 10-வது டி20 உலகக் கோப்பை சூப்பர்-8 ஆட்டத்தில் முன்னாள் சாம்பியன் வெஸ்ட் இண்டீஸை எதிர்கொள்கிறது.
10-வது டி20 உலகக் கோப்பை கிரிக்கெட் தொடர் இறுதி கட்டத்தை நெருங்கி வரும் நிலையில், இன்று இரவு 7 மணிக்கு மும்பையில் நடைபெறும் சூப்பர்-8 ஆட்டத்தில் ஜிம்பாப்வே மற்றும் வெஸ்ட் இண்டீஸ் அணிகள் பலப்பரீட்சை நடத்துகின்றன. இந்தத் தொடரில் இதுவரை ஒரு தோல்வியைக் கூட சந்திக்காமல் அசுர பலத்துடன் வலம் வரும் ஜிம்பாப்வே அணி, இன்று முன்னாள் சாம்பியன் வெஸ்ட் இண்டீஸை எதிர்கொள்கிறது.
ஆஸ்திரேலியா மற்றும் இலங்கை போன்ற வலுவான அணிகளையே லீக் சுற்றில் வீழ்த்தி விஸ்வரூபம் எடுத்துள்ள ஜிம்பாப்வே, தனது அதிரடி ஆட்டத்தைத் தொடரக் காத்திருக்கிறது. குறிப்பாக 179 ரன்களை வெற்றிகரமாக சேஸ் செய்த அந்த அணியின் பேட்டிங் வரிசை தற்போது மிகவும் அபாயகரமாகத் தெரிகிறது.
இருப்பினும், கேப்டன் ஷாய் ஹோப் தலைமையிலான வெஸ்ட் இண்டீஸ் அணியும் குறைந்தது அல்ல. இங்கிலாந்து மற்றும் ஸ்காட்லாந்து போன்ற அணிகளைத் துவம்சம் செய்த வெஸ்ட் இண்டீஸ், பேட்டிங் மற்றும் பந்துவீச்சில் சம பலத்துடன் உள்ளது. ஜிம்பாப்வே அணியின் தற்போதைய ஃபார்மை கருத்தில் கொண்டு, வெஸ்ட் இண்டீஸ் இன்று மிகுந்த எச்சரிக்கையுடனும் புதிய வியூகங்களுடனும் களம் இறங்கும் என்பதில் ஐயமில்லை.
