சொத்துப் பதிவு ஆவணங்களில் மோசடியைத் தடுக்க அரசு அதிரடி!

சொத்துப் பதிவு ஆவணங்களில் முறைகேடுகளைத் தடுக்க தமிழ்நாடு பதிவுத் துறை பல்வேறு தடுப்பு நடவடிக்கைகளை அறிமுகப்படுத்தியுள்ளது.

ஒரு சொத்தின் உண்மையான உரிமையாளரை அடையாளம் காண, அவரது அங்கீகரிக்கப்பட்ட அடையாள அட்டைகள் மற்றும் ஆதார் தரவுத்தளத்தில் இருந்து கைரேகை சரிபார்ப்பு ஆகியவையே தற்போது கடைப்பிடிக்கப்படும் முறையாக உள்ளது. இந்த நிலையில் தமிழ்நாடு அரசின் பத்திரப் பதிவுத் துறை தற்போது தானியங்கி பயோமெட்ரிக் அடையாளத்தின் ஒரு பகுதியாக கருவிழி அங்கீகாரத்தை அறிமுகப்படுத்தியுள்ளது. அனைத்து துணைப் பதிவாளர் அலுவலகங்களிலும் கருவிழி ஸ்கேனரை நிறுவும் பணி ஏற்கனவே நடைபெற்று வந்த நிலையில், இந்த புதிய முறை தற்போது அறிமுகப்படுத்தப்பட்டுள்ளது.

மாநிலம் முழுவதும் உள்ள பத்திரப் பதிவு அலுவலக அதிகாரிகளுக்கு, உரிமைகோரல்கள் மற்றும் நற்சான்றிதழ்களை சரிபார்ப்பதற்காக, ஏற்கனவே உள்ள நடைமுறைகளுடன் கைரேகை மற்றும் கருவிழி ஸ்கேனிங் நெறிமுறைகளை பின்பற்றுமாறு உத்தரவிடப்பட்டுள்ளது.

சொத்துப் பதிவில் முறைகேடுகளைத் தடுப்பதற்கான தொடர் முயற்சிகளின் ஒரு பகுதியாக, தற்போது விற்பனையாளர்களின் பெயரில் ‘பட்டா’ இருந்தால் மட்டுமே பதிவு செய்வதற்கான டோக்கன்கள் வழங்கப்படுகின்றன. அத்துடன், ஒரு சர்வே எண்ணில் பிரிக்கப்பட்ட துணைப்பிரிவு ‘தமிழ்நிலம்’ தரவுத்தளத்தில் ஆன்லைனில் புதுப்பிக்கப்படும் போது மட்டுமே நிலத்தின் பதிவு அனுமதிக்கப்படும்.

சொத்துக்களைப் பதிவு செய்யும் போது கிராம நிர்வாக அலுவலர்களிடம் இருந்து பதிவு, சிட்டா மற்றும் நில வரைபடம் போன்ற நிலப் பதிவேடுகளின் சான்றளிக்கப்பட்ட (அல்லது) சான்றளிக்கப்பட்ட நகல்களை வழங்க வேண்டும் என நில சொத்துக்களை பதிவு செய்ய வருவோர்/உரிமையாளர்களை வற்புறுத்தக் கூடாது என பத்திரப் பதிவு அலுவலக அதிகாரிகளுக்கு நில அளவை மற்றும் தீர்வுத் துறை இயக்குநர் பி. மதுசூதன் ரெட்டி அறிவுறுத்தி உள்ளார்.

கிராம நிர்வாக அலுவலரால் ( விஏஓ) சான்றளிக்கப்பட்ட பல்வேறு ஆவணங்களின் சான்றளிக்கப்பட்ட நகல்களை துணைப் பதிவாளர்கள் கேட்கும் நிகழ்வுகள் தற்போது காணப்படுகின்றன. கிராம நிர்வாக அலுவலரால் சரிபார்த்த பிறகு பதிவிறக்கம் செய்யப்பட்ட ஆவணத்தைப் பத்திரப் பதிவு செய்யும் அதிகாரிகள் ஏற்பதில்லை என்றும், மாறாக விஏஓ-வின் கையொப்பத்தை முத்திரையுடன் கூடிய ஆவணத்தை வழங்குமாறு வலியுறுத்தப்படுவதாகவும் அவர் சுட்டிக்காட்டி உள்ளார்.

எனவே, இனி இது சம்பந்தமாக, கிராமப்புற (ஏ-பதிவு, சிட்டா, எஃப்எம்எஸ்) மற்றும் நகர்ப்புற டவுன் சர்வே நிலப் பதிவேடு (டிஎஸ்எல்ஆர்) நிலப் பதிவேடுகளின் (நத்தம் நீங்கலாக) சான்றளிக்கப்பட்ட (அல்லது) சான்றளிக்கப்பட்ட நகல்களை வழங்க வேண்டாம் என்று விஏஓக்கள் மற்றும் பிற வருவாய் அதிகாரிகளுக்குத் தெரிவிக்கப்பட்டுள்ளதாகவும் அவர் கூறி உள்ளார்.

கள அளவீட்டு புத்தக நகல் ஏதேனும் மக்களால் கோரப்பட்டிருந்தால், https://eservices.tn.gov.in என்ற இணையதளத்தில் பிரிண்ட் அவுட் எடுக்குமாறு விஏஓ-க்கள் தெரிவிக்க வேண்டும்.

க்யூஆர் குறியீடுகளை ஸ்கேன் செய்து அல்லது ‘ஸ்டார்’ மற்றும் ‘தமிழ்நிலம்’ இணையதளங்களின் ஒருங்கிணைந்த மென்பொருள் மூலம் பதிவுகளின் நம்பகத்தன்மையை சரிபார்க்க வேண்டும். இனிமேல் இது விஷயத்தில் பொதுமக்களை அலைகழிக்கக்கூடாது எனப் பத்திரப் பதிவு அதிகாரிகளுக்கு அறிவுறுத்தப்படும் என்று ரெட்டி மேலும் தெரிவித்துள்ளார்.