தைப்பூசத் திருவிழா 2026: தமிழகம் முழுவதும் 965 சிறப்பு பேருந்துகள் இயக்கம்!

தைப்பூசத்தை முன்னிட்டு பக்தர்களின் வசதிக்காகத் தமிழகம் முழுவதும் 965 சிறப்புப் பேருந்துகள் இயக்கப்படுகின்றன.

தைப்பூசத் திருவிழா மற்றும் வார இறுதி நாட்களை முன்னிட்டு, தமிழக அரசுப் போக்குவரத்துக் கழகம் சார்பில் 965 சிறப்பு பேருந்துகள் இயக்கப்பட உள்ளன. ஜனவரி 30, 31 மற்றும் பிப்ரவரி 1 ஆகிய தேதிகளில் பயணிகள் வசதிக்காகச் சென்னை மற்றும் பிற முக்கிய நகரங்களிலிருந்து இந்தப் பேருந்துகள் இயக்கப்படத் திட்டமிடப்பட்டுள்ளது.

2026-ம் ஆண்டு தைப்பூசத் திருவிழா மற்றும் அதனைத் தொடர்ந்து வரும் வார இறுதி நாட்களை முன்னிட்டு, பொதுமக்கள் தங்கள் சொந்த ஊர்களுக்கும், அறுபடை வீடுகள் உள்ளிட்ட முக்கிய ஆன்மீகத் தலங்களுக்கும் தடையின்றி பயணம் செய்ய ஏதுவாகத் தமிழ்நாடு அரசுப் போக்குவரத்துக் கழகம் விரிவான ஏற்பாடுகளைச் செய்துள்ளது.

இதன்படி, ஜனவரி 30, 31 மற்றும் பிப்ரவரி 1 ஆகிய மூன்று நாட்களில் மொத்தம் 965 சிறப்பு பேருந்துகள் இயக்கப்பட உள்ளன. குறிப்பாகச் சென்னையிலிருந்து தென் மாவட்டங்களுக்குச் செல்லும் பயணிகளின் வசதியைக் கருத்தில் கொண்டு, கிளாம்பாக்கம் பேருந்து முனையத்திலிருந்து அதிகப்படியான பேருந்துகள் இயக்கப்படுகின்றன.

ஜனவரி 30-ம் தேதி 360 பேருந்துகளும், ஜனவரி 31-ம் தேதி 485 பேருந்துகளும் கிளாம்பாக்கத்திலிருந்து இயக்கப்படவுள்ளதாகப் போக்குவரத்துத் துறை அதிகாரப்பூர்வமாக அறிவித்துள்ளது.
சென்னையின் மற்ற பகுதிகளான கோயம்பேடு மற்றும் மாதவரம் ஆகிய இடங்களிலிருந்தும் சிறப்பு பேருந்துகள் இயக்கத் திட்டமிடப்பட்டுள்ளது. கோயம்பேடு பேருந்து நிலையத்திலிருந்து ஜனவரி 30 மற்றும் 31 ஆகிய தேதிகளில் நாளொன்றுக்கு தலா 60 சிறப்பு பேருந்துகள் வீதம் இயக்கப்படும்.

அதேபோல், மாதவரம் பேருந்து நிலையத்திலிருந்து ஜனவரி 30 மற்றும் 31 ஆகிய தேதிகளில் தலா 20 சிறப்பு பேருந்துகள் இயக்கப்பட உள்ளன. இதுமட்டுமின்றி, வெளிமாநிலங்கள் மற்றும் பிற மாவட்டங்களிலிருந்து பயணிப்பவர்களுக்காகப் பெங்களூர், திருப்பூர், ஈரோடு மற்றும் கோவையில் இருந்து சுமார் 200 சிறப்பு பேருந்துகள் பல்வேறு பகுதிகளுக்கு இயக்கப்படத் தயாராக உள்ளன.
இந்தச் சிறப்புப் பேருந்து இயக்கத்தின் மூலம் தைப்பூசத் திருநாளில் பழனி, திருச்செந்தூர் உள்ளிட்ட கோவில்களுக்குச் செல்லும் பக்தர்களும், வார இறுதி விடுமுறைக்காக ஊர் திரும்புபவர்களும் பெரும் பயனடைவார்கள்.

பயணிகள் கூட்ட நெரிசலைத் தவிர்க்கவும், கடைசி நேர அலைச்சலைத் தவிர்க்கவும் தங்களது பயணத்தை முன்கூட்டியே திட்டமிட்டு, அரசுப் போக்குவரத்துக் கழகத்தின் அதிகாரப்பூர்வ இணையதளம் அல்லது மொபைல் செயலி வாயிலாக முன்பதிவு செய்துகொள்ளுமாறு அறிவுறுத்தப்பட்டுள்ளனர். தைப்பூசத்தை முன்னிட்டு மேற்கொள்ளப்பட்டுள்ள இந்தச் சிறப்புப் போக்குவரத்து ஏற்பாடுகள் பொதுமக்களிடையே பெரும் வரவேற்பைப் பெற்றுள்ளன.