டி20 உலகக் கோப்பை: நட்சத்திர வீரர்கள் விலகலால் ஆஸ்திரேலியாவுக்கு பின்னடைவு!
கம்மின்ஸ் மற்றும் ஹேசில்வுட் காயம் காரணமாக விலகியது ஆஸ்திரேலிய அணிக்கு பெரும் பின்னடைவை ஏற்படுத்தியுள்ளது.
இந்தியா மற்றும் இலங்கையில் வரும் பிப்ரவரி 7-ஆம் தேதி முதல் மார்ச் 8-ஆம் தேதி வரை நடைபெறவுள்ள 10-வது டி20 உலகக் கோப்பை கிரிக்கெட் தொடருக்கு முன்னதாக, ஆஸ்திரேலிய அணி அடுத்தடுத்து முக்கிய வீரர்களை இழந்து பெரும் பின்னடைவைச் சந்தித்துள்ளது. மொத்தம் 20 நாடுகள் பங்கேற்கும் இந்த பிரம்மாண்ட தொடருக்காக அறிவிக்கப்பட்ட 15 பேர் கொண்ட ஆஸ்திரேலிய அணியில் இடம் பெற்றிருந்த நட்சத்திர வீரர் பாட் கம்மின்ஸ் மற்றும் மேட் ஷார்ட் ஆகியோர் காயம் காரணமாக தொடரிலிருந்து விலகியுள்ளனர். இவர்களுக்குப் பதிலாக பென் ட்வார்ஷியஸ் மற்றும் மேட் ரென்ஷா ஆகியோர் அணியில் சேர்க்கப்பட்டுள்ளனர். அதே வேளையில், அந்த அணியின் முன்னணி வேகப்பந்து வீச்சாளர் ஜோஷ் ஹேசில்வுட்டும் காயம் காரணமாக தொடரிலிருந்து முழுமையாக விலகியிருப்பது ஆஸ்திரேலிய அணிக்கு பேரிடியாக அமைந்துள்ளது.
ஏற்கனவே பாகிஸ்தானுக்கு எதிரான டி20 தொடரில் ஒரு போட்டியில் கூட வெற்றி பெற முடியாமல் ஆஸ்திரேலிய அணி திணறி வரும் சூழலில், கம்மின்ஸ் மற்றும் ஹேசில்வுட் போன்ற அனுபவம் வாய்ந்த பந்துவீச்சாளர்கள் இல்லாதது அந்த அணியின் பலத்தை வெகுவாகக் குறைத்துள்ளது. இந்தியா மற்றும் இலங்கை போன்ற ஆசிய நாடுகளின் ஆடுகளங்களில் விளையாடுவது சவாலாக இருக்கும் நிலையில், முக்கிய வீரர்களின் இந்த விலகல் உலகக் கோப்பைத் தொடரில் ஆஸ்திரேலியாவின் வெற்றி வாய்ப்பைப் பாதிக்கும் என கிரிக்கெட் விமர்சகர்கள் கருதுகின்றனர்.
