2025 ஆஸ்கார் விருது: ஐந்து விருதுகளை அள்ளிய ‘அனோரா’… விருது பட்டியல் முழு விவரம்!

சர்வதேச அளவில் திரையுலகின் மிக உயரிய விருதாக கருதப்படும் ஆஸ்கர் விருது, திரைப்பட ஆளுமைகளால் மிக முக்கியமான விருது விழாவாக பார்க்கப்படுகிறது. அந்த வகையில், 2024 ஆம் ஆண்டு வெளிவந்த படங்களுக்கான 97 ஆவது ஆஸ்கர் விருது வழங்கும் விழா லாஸ் ஏஞ்சல்ஸ் ஹாலிவுட்டில் உள்ள டால்பி தியேட்டரில் இந்திய நேரப்படி, இன்று அதிகாலை 5.30 மணிக்கு கோலாகலாமாக தொடங்கியது.

5 விருதுகளை அள்ளிய ‘அனோரா’

கடந்த ஆண்டு கேன்ஸ் திரைப்பட விழாவில் பாம் டி’ஓர் விருதை வென்ற காதல்-நகைச்சுவை படமான ‘அனோரா’ (Anora)சிறந்த படம் , சிறந்த நடிகை, சிறந்த இயக்குனர், சிறந்த எடிட்டிங் மற்றும் சிறந்த அசல் திரைக்கதை என ஐந்து விருதுகளை வென்றது. படத்தின் தயாரிப்பாளரும் இயக்குநருமான சீன் பேக்கர் சிறந்த எடிட்டர் மற்றும் சிறந்த அசல் திரைக்கதைக்கான விருதை வென்றார். படத்தில் அனி என்ற வெளிநாட்டு நடனக் கலைஞராக தனது நடிப்பால் பார்வையாளர்களை வியப்பில் ஆழ்த்திய நடிகை மைக்கி மேடிசன், சிறந்த நடிகைக்கான விருதை வென்றார்.

அட்ரியன் பிராடி நடித்த ‘தி ப்ரூடலிஸ்ட்’ (The Brutalist) சிறந்த நடிகர், சிறந்த பின்னணி இசை, சிறந்த ஒளிப்பதிவு என மூன்று விருதுகளை வென்றது.

இரண்டு பிரிவுகளில் முன்னணியில் இருந்த ‘தி சப்ஸ்டன்ஸ்’ மற்றும் ‘தி கான்க்ளேவ்’ படங்கள் முக்கிய விருதுகளை வெல்லாவிட்டாலும், முறையே சிறந்த ஒப்பனை மற்றும் சிகை அலங்காரம் மற்றும் சிறந்த தழுவல் திரைக்கதைக்கான விருதை வென்றன.

வால்டர் சால்ஸ் இயக்கிய ‘ஐ’ம் ஸ்டில் ஹியர்’ (‘I’m Still Here’) என்ற பிரேசிலிய திரைப்படம் சிறந்த சர்வதேச திரைப்படத்திற்கான விருதை வென்றது. இதற்கிடையில், ‘ஃப்ளோ’ (‘Flow’) சிறந்த அனிமேஷன் திரைப்படத்திற்கான விருதையும், ‘இன் தி ஷேடோ ஆஃப் தி சைப்ரஸ்’ (‘In The Shadow of the Cypress’ ) அனிமேஷன் குறும்படத்திற்கான விருதையும் வென்றது.

2024 ஆம் ஆண்டு வெளிவந்த படங்களுக்கான ஆஸ்கர் விருது பரிந்துரை பட்டியலில் 13 பிரிவுகளில் பரிந்துரை செய்யப்பட்டு பலரது கவனத்தையும் பெற்றது ஸ்பானிஷ் திரைப்படமான எமிலியா பெரெஸ் (Emilia Perez). இத்திரைப்படம், ஆங்கில மொழி அல்லாத திரைப்படங்களில் அதிகமாக நாமினேட் செய்யப்பட்ட திரைப்படம் என்ற புதிய சாதனை படைத்துள்ளது. இத்திரைப்படத்தில் நடித்த கார்லா சோஃபியா காஸ்கான் தான் Karla Sofía Gascón) ஆஸ்கர் விருது பட்டியலுக்கு தேர்வாகும் முதல் திருநங்கை என்பது கூடுதல் சிறப்பு.

இதையடுத்து த புரூட்டலிஸ்ட் (The Brutalist) என்ற ஆங்கிலத் திரைப்படம் 11 பிரிவுகளில் பரிந்துரை செய்யப்பட்டு இருந்தது. விக்கட் (Wicked) என்ற திரைப்படமும் 10 பிரிவுகளில் நாமினேட் செய்யப்பட்டு இருந்தது. கான்கிளேவ் (Conclave) மற்றும் A Complete Unkown ஆகிய திரைப்படங்கள் 9 பிரிவுகளில் பரிந்துரை செய்யப்பட்டிருந்தது.

97 ஆவது ஆஸ்கர் விருது பட்டியல்

சிறந்த திரைப்படம் – அனோரா (Anora)

சிறந்த இயக்குநர் – ஷான் பேக்கர் (Anora)

சிறந்த நடிகர் – ஏட்ரியன் ப்ரோடி (Adrien Brody) (The Brutalist)

சிறந்த நடிகை – மிக்கி மேடிசன் (Mikey Madison) (Anora)

சிறந்த அனிமேஷன் திரைப்படம் – ஃப்ளோ (Flow)

சிறந்த தழுவல் திரைக்கதை – கான்கிளேவ் (Conclave)

சிறந்த அசல் திரைக்கதை – அனோரா (Anora)

சிறந்த துணை நடிகர் – கியரென் குல்க்கின் (Kieran Culkin) (A Real Pain)

சிறந்த துணை நடிகை – ஸோயி சல்டானா (Zoe Saldana) (Emilia Perez)

சிறந்த ஆடை வடிவமைப்பு – விக்கெட் (Wicked)

சிறந்த ஆவணப்படம் – நோ அதர் லேண்ட் (No other Land)

சிறந்த ஒளிப்பதிவு – த ப்ரூட்டலிஸ்ட் (The Brutalist)

சிறந்த படத்தொகுப்பு – அனோரா (Anora)

சிறந்த ஆடை வடிவமைப்பு & சிகை அலங்காரம் – த சப்ஸ்டன்ஸ் (The Substance)

சிறந்த ஆவணக் குறும்படம் – ஒன்லி கேர்ள் இன் தி ஆர்கெஸ்ட்ரா (The Only Girl in the Orchestra)

சிறந்த பாடல் – எல் மால் El Mal (Movie – Emilia Pérez; Music by Clément Ducol and Camille)

சிறந்த தயாரிப்பு வடிவமைப்பு – விக்கெட் (Wicked)

சிறந்த அனிமேஷன் குறும்படம் – இன் தி ஷேடோ ஆஃப் தி சைப்ரஸ் (In the Shadow of the Cypress)

சிறந்த லைவ் ஆக்‌ஷன் குறும்படம் – ஐ ஆம் நாட் ஏ ரோபோ (I’m Not a Robot)

சிறந்த ஒலியமைப்பு – டூன் 2 (Dune 2)

சிறந்த விஷுவல் எஃபெக்ட்ஸ் – டூன் 2 (Dune 2)

சிறந்த சர்வதேச திரைப்படம் – ஐ ஆம் ஸ்டில் ஹியர் (I’m Still Here)

சிறந்த பின்னணி இசை – த ப்ரூட்டலிஸ்ட் (The Brutalist)

இந்தியா சார்பில் குறும்படம் லைவ் ஆக்‌ஷன் குறும்பட பிரிவுக்கு அனுப்பப்பட்டு, விருது கிடைக்கலாம் என எதிர்பார்க்கப்பட்ட ‘அனுஜா’ விருது வெல்லும் வாய்ப்பை இழந்துள்ளது.