கும்பகோணம் வெற்றிலை, தோவாளை மாணிக்க மாலை…காவிரியின் பரிசும் கைவினை கலையின் சிறப்பும்!

தமிழ்நாட்டின் பாரம்பரிய பொருட்களுக்கு உலகளாவிய அங்கீகாரம் கிடைப்பது என்பது தமிழர்களுக்கு பெருமை சேர்ப்பதோடு மட்டுமல்லாது, நமது மண்ணின் வளத்தையும், மக்களின் உழைப்பையும் உலகிற்கு எடுத்துரைக்கும் சான்றாகவும் திகழ்கிறது.

அந்த வகையில், கன்னியாகுமரி மாவட்டத்தின் தோவாளை மாணிக்க மாலை மற்றும் தஞ்சாவூர் மாவட்டத்தின் கும்பகோணம் வெற்றிலை ஆகியவற்றுக்கு புவிசார் குறியீடு (Geographical Indication – GI) வழங்கப்பட்டுள்ளது. இது தமிழ்நாட்டின் பண்பாட்டு மற்றும் விவசாய பாரம்பரியத்தை உலக அரங்கில் பறைசாற்றும் முக்கியமான சாதனையாகும்.

புவிசார் குறியீடு என்றால் என்ன?

புவிசார் குறியீடு என்பது ஒரு குறிப்பிட்ட பகுதியைச் சேர்ந்த தனித்துவமான பொருட்களுக்கு வழங்கப்படும் அடையாளமாகும். இது அந்த பொருளின் தரம், பாரம்பரியம் மற்றும் அந்த பகுதியின் இயற்கை அம்சங்களுடனான தொடர்பை உறுதிப்படுத்துகிறது. இந்த அங்கீகாரம் பெற்ற பொருட்களை வேறு எவரும் போலியாக பயன்படுத்த முடியாது என்பதால், உற்பத்தியாளர்களுக்கு பாதுகாப்பு மற்றும் சந்தை மதிப்பு கிடைக்கிறது. தமிழ்நாட்டில் ஏற்கனவே 62 பொருட்களுக்கு இந்த குறியீடு வழங்கப்பட்டுள்ள நிலையில், தற்போது தோவாளை மாணிக்க மாலையும், கும்பகோணம் வெற்றிலையும் இப்பட்டியலில் இணைந்துள்ளன.

கும்பகோணம் வெற்றிலை: காவிரியின் பரிசு

கும்பகோணம் வெற்றிலை தமிழ்நாட்டின் விவசாய பாரம்பரியத்தின் அடையாளமாக திகழ்கிறது. காவிரி படுகையின் வளமான மண்ணும், தண்ணீரும் இதன் தனித்துவமான சுவைக்கு காரணமாக அமைகின்றன. இவை, மருத்துவ குணம், மிதமான காரத்தன்மை கொண்டவை என வேளாண் துறை ஆய்வுக் கட்டுரையை வெளியிட்டுள்ளது. இப்பகுதியில் விளையும் வெற்றிலை, அதன் அமைப்பு மற்றும் நறுமணத்தில் மற்ற வெற்றிலைகளை விட மாறுபட்டு நிற்கிறது.

பாரம்பரிய அறிவையும், நுணுக்கமான உழைப்பையும் பயன்படுத்தி உற்பத்தி செய்யப்படும் இந்த வெற்றிலை, முதல் முறையாக விவசாய பொருளாக புவிசார் குறியீடு பெற்றுள்ளது. இதன் மூலம், உலக சந்தையில் இதற்கு தனி மதிப்பு கிடைக்கும் என்பதுடன், விவசாயிகளின் வாழ்வாதாரமும் மேம்படும்.2022 ஆம் ஆண்டு ஜனவரி மாதம், தமிழ்நாடு வேளாண்மை மற்றும் ஊரக மேம்பாட்டு ஆய்வு மையம் மூலம் கும்பகோணம் வெற்றிலை உற்பத்தியாளர்கள் நலச்சங்கம் இதற்காக விண்ணப்பித்தது. இந்த முயற்சி இப்போது பலன் தந்துள்ளது. வெற்றிலை ஏற்றுமதியால் பொருளாதார லாபம் அதிகரிப்பதுடன், இப்பகுதியின் பெயர் உலகளவில் பரவும்.

தோவாளை மாணிக்க மாலை: கைவினை கலையின் சிறப்பு

கன்னியாகுமரி மாவட்டத்தின் தோவாளை பகுதியில் தயாரிக்கப்படும் மாணிக்க மாலை, தமிழ்நாட்டின் கைவினை கலையின் அற்புத படைப்பாகும். வங்கக்கடல் மற்றும் அரபிக் கடல் காற்று, மேற்கு தொடர்ச்சி மலை சூழல் போன்றவற்றால் தோவாளை மலர் தனிச் சிறப்பு பெற்றுள்ளது. வெள்ளை மற்றும் சிவப்பு அரளி, பச்சை நொச்சி, சம்பா நாறு கொண்டு பாய் போன்று உருவாக்குவதால் இந்த மாலை மாணிக்கம் போன்று காட்சியளிக்கிறது. இந்த மாலை 140 ஆண்டு வரலாறு கொண்டது.

இது பாரம்பரிய முறையில், திறமையான கலைஞர்களால் கையால் தயாரிக்கப்படுகிறது. இதன் தனித்தன்மை, பயன்படுத்தப்படும் பொருட்கள் மற்றும் அவற்றை இணைக்கும் நுணுக்கமான கைவேலைப்பாடுகளில் உள்ளது. இந்த மாலைகள் பெரும்பாலும் ஆன்மிக நிகழ்வுகளிலும், சிறப்பு சந்தர்ப்பங்களிலும் பயன்படுத்தப்படுகின்றன.

தமிழ்நாடு கைவினைப்பொருட்கள் மேம்பாட்டு கழகம் மற்றும் குறு, சிறு மற்றும் நடுத்தர தொழில்கள் அமைச்சகம் மூலம் தோவாளை மாணிக்க மாலை கைவினை கலைஞர்கள் நலச்சங்கம் இதற்காக விண்ணப்பித்து, வெற்றி பெற்றுள்ளது. இந்த அங்கீகாரம், உள்ளூர் கலைஞர்களுக்கு பொருளாதார உயர்வை ஏற்படுத்துவதுடன், இப்பகுதியின் கலாச்சார பாரம்பரியத்தை பாதுகாக்கவும் உதவும்.

பொருளாதார மற்றும் கலாச்சார முக்கியத்துவம்

இந்த புவிசார் குறியீடு, கும்பகோணம் வெற்றிலை மற்றும் தோவாளை மாணிக்க மாலையை உலக சந்தையில் அறிமுகப்படுத்துவதற்கான வாய்ப்பை ஏற்படுத்தியுள்ளது. இதனால், விவசாயிகள் மற்றும் கைவினை கலைஞர்களின் வருமானம் பெருகும். மேலும், தமிழ்நாட்டின் பாரம்பரியத்தை அடுத்த தலைமுறைக்கு எடுத்துச் செல்லவும் இது உதவும். இந்த சாதனை, தமிழகத்தின் பொருளாதார வளர்ச்சியிலும், கலாச்சார பெருமையிலும் புதிய அத்தியாயத்தை எழுதியுள்ளது.