முத்துஸ்வாமி தீட்சிதரின் ஜெயந்தி விழா: எட்டயபுரம் அரண்மனையில் இசைக் கோலாகலம்!
கர்நாடக சங்கீத மும்மூர்த்திகளில் ஒருவரான ஐயன் முத்துஸ்வாமி தீட்சிதர், தெய்வீகத்தையும் இசையையும் இரண்டறக் கலந்து 72 மேளகர்த்தா ராகங்களிலும் கீர்த்தனைகளை இயற்றியவர். இசை உலகில் தன்னிகரற்ற புகழ் பெற்ற இவர், 64 ஆவது நாயன்மார் மற்றும் 13 ஆவது ஆழ்வார் போன்ற பட்டங்களுக்கு உரியவராகத் திகழ்ந்தவர்.
இவருடைய 250 ஆம் ஆண்டு ஜெயந்தி விழா, எட்டயபுரம் சமஸ்தானத்தின் சார்பில் அரண்மனை மைதானத்தில் கோலாகலமாகக் கொண்டாடப்பட்டது. இது அவரது இசைப் பங்களிப்பை நினைவுகூரும் ஒரு சிறப்பு நிகழ்வாக அமைந்தது.
எட்டயபுரம் அரண்மனையில் கோலாகலம்
எட்டயபுரம் சமஸ்தானம் சார்பில் நடைபெற்ற இந்த ஜெயந்தி விழா, அரண்மனை மைதானத்தில் கீர்த்தனை நிகழ்ச்சிகளுடன் இனிதே தொடங்கியது. கர்நாடக சங்கீத கலைஞரும், கலைமாமணி பட்டம் பெற்றவருமான நித்யஸ்ரீ மகாதேவன் கீர்த்தனை அரங்கேற்றம் செய்து விழாவிற்கு பெருமை சேர்த்தார். ஸ்ரீ இசைப்பள்ளியினர், முத்துஸ்வாமி தீட்சிதரின் கீர்த்தனைகளை இசைத்து இசை அஞ்சலி செலுத்தினர்.இந்நிகழ்ச்சி அனைவரையும் ஆன்மீக மற்றும் இசை ரசனையில் திளைக்க வைத்தது.
பின்னணி பாடகர்களின் இசை நிகழ்ச்சி
விழாவைத் தொடர்ந்து, பிரபல பின்னணி பாடகர்களான தசத்ய பிரகாஷ் மற்றும் பூஜா வைத்தியநாதன் ஆகியோர் இணைந்து ஒரு அற்புதமான இசை நிகழ்ச்சியை வழங்கினர். இவர்களின் பாடல்கள், முத்துஸ்வாமி தீட்சிதரின் பாரம்பரியத்தை நவீன தொடுதலுடன் பறைசாற்றியது.இது விழாவிற்கு மேலும் ஒரு சிறப்பு சேர்த்து, பார்வையாளர்களை மகிழ்ச்சியில் ஆழ்த்தியது.
சிறப்பு விருந்தினர்களின் பங்கேற்பு
இந்நிகழ்வில், புதுக்கோட்டை ராணியார் திருமதி. சாருபாலா ஆர்.தொண்டைமான், கள்ளிப்பட்டி ஜமீன் திரு. காகுத் கார்த்திகேயன், ராஜா ரவிவர்மா வழிப்பெயரன் கிளிமனூர் திரு. ராஜா ராமவர்ம தம்புரான், தூத்துக்குடி மாவட்ட ஆட்சித்தலைவர் இளம்பகவத் IAS, மாவட்ட முதன்மை நீதிபதி ஆர். வசந்தி, மகாகவி பாரதியாரின் பேரன் நிரஞ்சன் பாரதி உள்ளிட்ட சிறப்பு விருந்தினர்கள் பங்கேற்றனர். 300 க்கும் மேற்பட்ட பொதுமக்களும் இணைந்து முத்துஸ்வாமி தீட்சிதருக்கு இசை அஞ்சலி செலுத்தினர்.
விருந்தோம்பல்
நிகழ்வுக்கு வருகை தந்த அனைவரையும் உபசரிக்கும் விதமாக, எட்டயபுரம் சமஸ்தானம் சார்பில் இரவு விருந்து பரிமாறப்பட்டது. இது விழாவின் நிறைவை மேலும் சிறப்பாக்கியது. முத்துஸ்வாமி தீட்சிதரின் இசை மரபையும், அவரது ஆன்மீக பங்களிப்பையும் போற்றும் வகையில் இந்த விழா அமைந்து, அனைவரது மனதிலும் நீங்காத இடம் பிடித்தது.
