வளர்ச்சி விகிதத்தில் தமிழ்நாடு முன்னணி… 9.69% வளர்ச்சியின் பின்னணி காரணங்கள்!
மத்திய புள்ளியியல் மற்றும் திட்ட அமலாக்க அமைச்சகத்தின் சமீபத்திய தரவுகளின்படி, இந்தியாவிலேயே மிக உயர்ந்த வளர்ச்சி விகிதம் கொண்ட மாநிலமாக தமிழ்நாடு திகழ்வதாக தெரியவந்துள்ளது.
2024-25 ஆம் நிதியாண்டிற்கான தமிழ்நாட்டின் பொருளாதார வளர்ச்சி விகிதம் 9.69% என்று மத்திய அரசு அறிவித்துள்ளது. இதனை தனது எக்ஸ் சமூக வலைதள பக்கத்தில் பகிர்ந்துள்ள முதலமைச்சர் மு.க. ஸ் டாலின், “9.69% வளர்ச்சியுடன் தமிழ்நாடு இந்தியாவிலேயே மிக அதிக வளர்ச்சி விகிதத்தைப் பதிவு செய்துள்ளது. அதுவும் பாலின சமத்துவம், அனைத்துப் பகுதிகளுக்கும் சமமான வளர்ச்சி என அனைவரையும் உள்ளடக்கிய வளர்ச்சியில் தொடர்ந்து கவனம் செலுத்தி இந்தச் சாதனையை நாம் எட்டியுள்ளோம் என்பதுதான் மிகவும் பாராட்டுக்குரியது.
அடிப்படைகளில் உறுதி, நிலையான நிர்வாகம், தெளிவான தொலைநோக்கு ஆகியவற்றைக் கொண்டு நம் மாநிலம் மற்றும் மக்களின் எதிர்காலத்தை திராவிட மாடல் வடிவமைத்து வருகிறது. ஒரு டிரில்லியன் அமெரிக்க டாலர் பொருளாதாரம் எனும் நம் பேரிலக்கை நோக்கி வலிமையோடும் உறுதியோடும் விரைந்து கொண்டிருக்கிறோம்” எனத் தெரிவித்துள்ளார்.
வளர்ச்சிக்கான பின்னணி காரணங்கள்
இந்த சாதனை, தமிழ்நாட்டின் பொருளாதார பலத்தையும், பல்வேறு துறைகளில் அதன் தொடர்ச்சியான முன்னேற்றத்தையும் பிரதிபலிக்கிறது. இந்த நிலையில், தமிழ்நாட்டின் இந்த வளர்ச்சியின் பின்னணியில் உள்ள காரணங்களை அடுக்குகிறார்கள் தொழில்துறை மற்றும் பொருளாதார வல்லுநர்கள். அவை இங்கே…
மத்திய அரசின் தரவுகளின்படி, தமிழ்நாட்டின் மொத்த மாநில உள்நாட்டு உற்பத்தி (GSDP) 2023-24 ல் 15,71,368 கோடி ரூபாயாக இருந்தது. இது 2024-25 ல் 17,23,698 கோடி ரூபாயாக உயர்ந்துள்ளது. இந்த 9.69% உண்மையான வளர்ச்சி (பணவீக்கம் தவிர்த்தது), பெயரளவு வளர்ச்சியாக (பணவீக்கம் உட்பட) 14.02% ஆக உள்ளது. இதுவும் இந்திய மாநிலங்களில் முதலிடம் வகிக்கிறது. 2017-18 ல் 8.59% ஆக இருந்த முந்தைய உச்சத்தை முறியடித்த இது, 2020-21 ல் (கொரோனா ஆண்டு) 0.07% என்ற குறைந்த வளர்ச்சியிலிருந்து மீண்டு வந்ததையும் காட்டுகிறது.
தமிழ்நாட்டின் முதல் பொருளாதார ஆய்வறிக்கை (மார்ச் 2025) 8%க்கு மேல் வளர்ச்சியையும், மெட்ராஸ் பொருளாதார பள்ளியின் (MSE) ஆய்வு (ஜூலை 2024) 9.3% வளர்ச்சியையும் முன்னர் அறிவித்திருந்தன. ஆனால், உண்மையான வளர்ச்சி இவற்றையும் தாண்டியது. இது, தமிழ்நாட்டின் திட்டமிடலையும் செயல்திறனையும் பறைசாற்றுகிறது.
துறை வாரியான பங்களிப்பு
தமிழ்நாட்டின் வளர்ச்சி, மூன்றாம் நிலை (சேவைகள்) துறையில் 12.7% மற்றும் இரண்டாம் நிலை (தொழில்) துறையில் 9% வளர்ச்சியால் உந்தப்பட்டுள்ளது. மாநில மதிப்பு கூட்டலில் (GSVA) சேவைகள் துறை 53%, தொழில்துறை 37%, மற்றும் முதன்மை (வேளாண்மை) துறை 10% பங்களிக்கின்றன. சேவைகள் துறையில், ரியல் எஸ்டேட் (13.6%), தகவல் தொடர்பு (13%), மற்றும் வர்த்தகம், பழுதுபார்ப்பு, உணவகங்கள் (11.7%) ஆகியவை முன்னிலை வகிக்கின்றன.
தொழில்துறையில், உற்பத்தி (8%) மற்றும் கட்டுமானம் (10.6%) சிறப்பாக செயல்பட்டுள்ளன. ஆனால், முதன்மை துறை ஏமாற்றமளிக்கிறது, வெறும் 0.18% வளர்ச்சியுடன். பயிர்கள் பிரிவு -5.93% என்ற எதிர்மறை வளர்ச்சியையும், கால்நடைகள் 3.84% என்ற சுமாரான வளர்ச்சியையும் பதிவு செய்துள்ளன. வேளாண்மையின் இந்த பின்னடைவு, மழை மற்றும் ஆறுகளை சார்ந்திருப்பதால் ஏற்பட்டுள்ளது. இதற்கு காலநிலை மாற்றமும் ஒரு காரணமாக இருக்கலாம்.
ஒப்பீடு மற்றும் சாதனைகள்
குஜராத், பீகார், உத்தரப்பிரதேசம் உள்ளிட்ட 14 மாநிலங்களின் தரவுகள் இன்னும் வெளியிடப்படவில்லை என்றாலும், தமிழ்நாடு தற்போதைய தரவுகளில் முதலிடத்தில் உள்ளது. 2021-22 முதல் தொடர்ந்து 8% அல்லது அதற்கு மேல் வளர்ச்சியை பராமரித்து வருவது, கொரோனா, உலகளாவிய பொருளாதார சவால்களை எதிர்கொண்டு மீண்டு வரும் தமிழ்நாட்டின் பின்னடைவு திறனை வெளிப்படுத்துகிறது. இந்த நிலையில், “ 9.7% வளர்ச்சி தொடர்ந்தால், 2032-33 ல் தமிழ்நாடு ஒரு டிரில்லியன் டாலர் பொருளாதாரமாக மாறும்” என்கிறார்கள் பொருளாதார நிபுணர்கள்.
அனைவரையும் உள்ளடக்கிய வளர்ச்சி
முதலமைச்சர் ஸ்டாலின் குறிப்பிட்டபடி, இந்த வளர்ச்சி அனைவரையும் உள்ளடக்கியதாக உள்ளது. பாலின சமத்துவம், பிராந்திய சமநிலை, மற்றும் சமூக நீதியை மையமாகக் கொண்ட திராவிட மாடல், உறுதியான அடித்தளம் மற்றும் தெளிவான தொலைநோக்குடன் செயல்படுகிறது. 2030இல் ஒரு டிரில்லியன் டாலர் பொருளாதாரமாக மாற, தமிழ்நாடு 12% ஆண்டு வளர்ச்சியை பராமரிக்க வேண்டும். இதற்கு தொழில் விரிவாக்கம், உள்கட்டமைப்பு மேம்பாடு, மற்றும் டிஜிட்டல் மயமாக்கல் அவசியம்.
சவால்கள் மற்றும் எதிர்காலம்
வேளாண்மையை பலப்படுத்த, நீர்ப்பாசனம் மற்றும் நிலையான விவசாய முறைகளில் முதலீடு தேவை. மேலும், உலகளாவிய பொருளாதார ஏற்ற இறக்கங்களுக்கு எதிராக, மாநில அரசு எதிர்சுழற்சி நடவடிக்கைகளை (பொதுமுதலீடு, வரிச்சலுகைகள்) மேற்கொள்ள வேண்டும். தமிழ்நாடு, 4% நிலப்பரப்பு மற்றும் 6% மக்கள்தொகையுடன், தேசிய GDP-யில் 9.21% பங்களிக்கிறது.
2023-24 ல் GSDP 27.22 லட்சம் கோடி ரூபாயாக உள்ள நிலையில், இந்த வளர்ச்சி இந்தியாவின் மிக சக்திவாய்ந்த பொருளாதாரங்களில் ஒன்றாக தமிழ்நாட்டை நிலைநிறுத்துகிறது எனத் தெரிவிக்கும் பொருளாதார வல்லுநர்கள், தொடர்ந்து உயர்ந்த வளர்ச்சியை பராமரித்தால், 2030 இலக்கு நிச்சயம் எட்டப்படும் என்று அடித்துக் கூறுகிறார்கள்.
