ஆய்வு: ‘சமூக நீதியிலும் பாதுகாப்பிலும் தமிழகம் முன்னணி … கேரளாவும் அசத்தல்!’

இந்தியா டுடே நிறுவனம் 21 மாநிலங்கள் மற்றும் ஒரு யூனியன் பிரதேசத்தில் உள்ள 98 மாவட்டங்களில் 9,188 பேரிடம் நடத்திய சமீபத்திய ஆய்வு, தமிழ்நாட்டின் சமூக முன்னேற்றத்தை உலகறியச் செய்துள்ளது.

பொதுமக்களின் செயல்பாடுகள், பாதுகாப்பு, ஜாதி-மத-இன பாகுபாடு போன்ற 30 கேள்விகளை அடிப்படையாகக் கொண்ட இந்த ஆய்வில், தமிழ்நாடு மற்றும் கேரளா முதல் இரண்டு இடங்களைப் பிடித்து, முன்னேறிய மாநிலங்களாக திகழ்கின்றன. தமிழ்நாடு, தன் சமூக நீதி மரபையும், மக்களுக்கு அளிக்கும் பாதுகாப்பையும் மீண்டும் நிரூபித்துள்ளது.

தமிழ்நாட்டின் முன்னேற்றம்

இந்த ஆய்வில், அனைத்து பிரிவுகளிலும் தமிழ்நாடு முதல் இரண்டு இடங்களுக்குள் உள்ளது. ஜாதி, மதம், இனம் ஆகியவற்றின் பெயரால் பாகுபாடு குறைவான மாநிலங்களில், தமிழ்நாடு கேரளாவுடன் முதல் மூன்று இடங்களைப் பகிர்ந்து கொள்கிறது. பொது பாதுகாப்பு தரவரிசையில், கேரளம் முதலிடத்தைப் பெற்றாலும், தமிழ்நாடு மூன்றாமிடத்தில் உள்ளது. இது, தமிழகத்தில் சட்டம் ஒழுங்கு, சமூக நல்லிணக்கம் ஆகியவற்றை பராமரிப்பதில் அரசின் திறனை வெளிப்படுத்துகிறது. மேற்கு வங்கம் மூன்றாவது இடத்தையும், மகாராஷ்டிரா, ஒடிசா, இமாசலப்பிரதேசம் போன்றவை முதல் 10 இடங்களையும் பெற்றுள்ளன.

தமிழ்நாட்டின் இந்த சாதனை, திராவிட மாடல் ஆட்சியின் வெற்றியை பறைசாற்றுகிறது. முதலமைச்சர் மு.க. ஸ்டாலின் தலைமையிலான அரசு, சமூக நீதி, சமத்துவம், மற்றும் பொதுமக்களின் நலனை முன்னிறுத்திய திட்டங்களை தொடர்ந்து செயல்படுத்தி வருகிறது. கல்வி, சுகாதாரம், வேலைவாய்ப்பு ஆகியவற்றில் சமமான அணுகலை உறுதி செய்யும் தமிழகத்தின் கொள்கைகள், இந்த ஆய்வில் அதன் உயர்ந்த இடத்திற்கு காரணமாக அமைந்துள்ளன. ‘தமிழ்நாடு ஒரு சமூக நீதி முன்மாதிரி’ என்று இந்தியா டுடே ஆய்வு சுட்டிக்காட்டியுள்ளது.

பின்தங்கிய மாநிலங்களும் பாஜக ஆட்சியும்

மறுபுறம், பாஜக ஆளும் மாநிலங்கள் இந்த ஆய்வில் பின்னடைவை சந்தித்துள்ளன. உத்தரப்பிரதேசம் 22-வது இடத்துடன் நாட்டிலேயே மிக மோசமான மாநிலமாகவும், குஜராத் 21 ஆவது இடத்திலும், மத்தியப்பிரதேசம் 19-வது இடத்திலும் உள்ளன. பாகுபாடு, பாதுகாப்பு, மற்றும் பொதுமக்கள் நலனில் இந்த மாநிலங்கள் தோல்வியடைந்துள்ளன. உத்தரப்பிரதேசத்தில் சட்டம் ஒழுங்கு சீர்குலைவு, பெண்களுக்கு எதிரான குற்றங்கள், சமூக பிளவுகள் ஆகியவை தொடர்ந்து பிரச்னையாக உள்ளன. குஜராத், பொருளாதார வளர்ச்சியை முன்னிறுத்தினாலும், சமூக நல்லிணக்கத்தில் பின்தங்கியுள்ளது.

தமிழ்நாட்டின் தனித்துவம்

தமிழ்நாடு, பாகுபாடு குறைவான மாநிலமாக திகழ்வது, பெரியார், அண்ணா ஆகியோரின் சமூக நீதி பாரம்பரியத்தை பிரதிபலிக்கிறது. மக்கள் தொகையில் 69% இட ஒதுக்கீடு, சாதி அடிப்படையிலான பாகுபாட்டை எதிர்க்கும் சட்டங்கள், மற்றும் பொது பாதுகாப்பு நடவடிக்கைகள் ஆகியவை தமிழகத்தை முன்னிலைப்படுத்துகின்றன. கேரளாவைப் போலவே, தமிழ்நாடும் மனித மேம்பாட்டு குறியீட்டில் (HDI) உயர்ந்து நிற்கிறது. 2023-24 ஆம் ஆண்டு தமிழக பட்ஜெட்டில், சமூக நலத்திற்காக ரூ.1.5 லட்சம் கோடி ஒதுக்கப்பட்டது, இது மக்களின் வாழ்க்கை தரத்தை உயர்த்தியுள்ளது.

பல நிலைகளில் கேரளாவுடன் இணைந்து முதல் இரு இடங்களைப் பிடித்த தமிழகம், வட மாநிலங்களுக்கு முன்மாதிரியாக உள்ளது. சமத்துவமும் பாதுகாப்பும் தமிழ்நாட்டின் பலமாக திகழ்கின்றன என்பதே இந்த ஆய்வு சொல்லும் அடிப்படை அம்சமாக உள்ளது.