சென்னையில் மெட்ரோ பயணிகளின் எண்ணிக்கை அதிகரிப்பால் நிறுவனத்தின் வருவாய் கணிசமாக உயர்வு!

விளம்பரங்கள் மற்றும் குத்தகை மூலம் சென்னை மெட்ரோவின் வருவாய் 15% அதிகரித்து ரூ.425.64 கோடியாக உயர்ந்து புதிய சாதனை படைத்துள்ளது.

சென்னையின் போக்குவரத்து முதுகெலும்பாக விளங்கும் சென்னை மெட்ரோ ரயில் நிறுவனம், தனது வருவாய் ஈட்டும் முறைகளில் புதிய இலக்குகளை எட்டி வருகிறது. தற்போது இரண்டு முக்கிய வழித்தடங்களில் இயக்கப்படும் மெட்ரோ ரயில்களில் தினசரி 3 லட்சத்திற்கும் அதிகமான பயணிகள் பயணிக்கின்றனர். பயணக் கட்டணத்தை மட்டுமே நம்பியிருக்காமல், நிர்வாகம் மேற்கொண்ட பல்வேறு ஆக்கப்பூர்வமான முயற்சிகளால் நிறுவனத்தின் நிதி நிலை கணிசமாக உயர்ந்துள்ளது. குறிப்பாக, ரயில் நிலையங்களில் வாகன நிறுத்துமிடங்களை அதிகரித்தல், காலி இடங்களை வணிக ரீதியாக நீண்ட கால குத்தகைக்கு விடுதல் மற்றும் ரயில் பெட்டிகள் முதல் நிலையங்கள் வரை விளம்பரங்களுக்கு அனுமதி அளித்தல் போன்ற திட்டங்கள் வருவாயைப் பெருக்க முக்கியக் காரணமாக அமைந்துள்ளன.

சமீபத்தில் வெளியிடப்பட்ட 2024-25 நிதியாண்டு அறிக்கையின்படி, சென்னை மெட்ரோவின் மொத்த வருவாய் ரூ.369.49 கோடியிலிருந்து ரூ.425.64 கோடியாக உயர்ந்து, 15 சதவீத வளர்ச்சியைப் பதிவு செய்துள்ளது. இதில் மிக முக்கியமாக, விளம்பரம் மற்றும் குத்தகை உள்ளிட்ட இதர சேவைகள் மூலம் கிடைக்கும் வருவாய் மட்டும் 30 சதவீதம் அதிகரித்து, ரூ.104.30 கோடியிலிருந்து ரூ.135.39 கோடியாக உயர்ந்துள்ளது. வரும் ஆண்டுகளில் புதிய வழித்தடங்கள் பயன்பாட்டுக்கு வரும்போது பயணிகளின் எண்ணிக்கை மற்றும் இதர வணிக வருவாய் இன்னும் பல மடங்கு அதிகரிக்கும் என மெட்ரோ அதிகாரிகள் நம்பிக்கை தெரிவித்துள்ளனர்.