2026-ன் முதல் சூரிய கிரகணத்தை முன்னிட்டு கூகுள் தேடல் பக்கத்தில் “நெருப்பு வளைய” அனிமேஷன் அம்சம் அறிமுகம் செய்யப்பட்டுள்ளது.
2026 ஆம் ஆண்டின் முதல் வானியல் அதிசயமான வளைய சூரிய கிரகணம் இன்று, பிப்ரவரி 17-ம் தேதி நிகழவிருப்பதை முன்னிட்டு, கூகுள் நிறுவனம் தனது தேடல் பக்கத்தில் ஒரு பிரத்யேக அனிமேஷன் அம்சத்தை அறிமுகப்படுத்தி பயனர்களை ஆச்சரியப்படுத்தியுள்ளது. பயனர்கள் கூகுளில் “Solar Eclipse” அல்லது “Surya Grahan” போன்ற சொற்களைத் தேடும்போது, திரையில் சந்திரன் மெல்ல நகர்ந்து சூரியனை மறைக்கும் மெய்நிகர் காட்சி தோன்றி வியக்க வைக்கிறது. முழுமையான மறைப்பு ஏற்படாத இந்த ‘கங்கண சூரிய கிரகணத்தில்’, சந்திரனின் நிழல் சூரியனின் மையப்பகுதியை மட்டுமே மறைக்கும்; இதனால் சூரியனின் விளிம்புப் பகுதிகள் மட்டும் மின்னும் தங்க வளையம் போன்ற அபூர்வத் தோற்றத்தை உருவாக்குகின்றன. விண்வெளி ஆர்வலர்களால் “நெருப்பு வளையம்” (Ring of Fire) என்று அழைக்கப்படும் இந்தத் தோற்றத்தை கூகுளின் அனிமேஷன் தத்ரூபமாகப் பிரதிபலிக்கிறது. இந்திய நேரப்படி இன்று பிற்பகல் 3:26 மணிக்குத் தொடங்கி இரவு 7:57 மணி வரை நடைபெறும் இந்த நிகழ்வு, இந்தியாவில் புலப்படாவிட்டாலும் அண்டார்டிகா மற்றும் தென் அமெரிக்கப் பகுதிகளில் இருப்பவர்கள் இந்த அழகிய அண்டவெளியின் அற்புதத்தை நேரடியாகக் காண முடியும்.