தமிழ்நாடு சுற்றுலாத்துறையில் ஒரு ஆச்சரியமான மாற்றம் நிகழ்ந்துள்ளது. ஊட்டி, கொடைக்கானல் அல்லது சென்னை போன்ற இடங்களைப் பின்னுக்குத் தள்ளி, கடந்த ஆகஸ்ட் மாதத்தில் அதிக சுற்றுலாப் பயணிகளை ஈர்த்த மாவட்டமாக திருச்சி முதலிடம் பிடித்துச் சாதனை படைத்துள்ளது.
டாப் 3 மாவட்டங்கள் (உள்நாட்டுப் பயணிகள்): திருச்சி மாவட்டம், வரலாறு மற்றும் ஆன்மீகச் சுற்றுலாவின் மையமாகத் திகழ்வதால், ஆகஸ்ட் மாதத்தில் மட்டும் 23.09 லட்சம் சுற்றுலாப் பயணிகளை ஈர்த்துள்ளது.
திருச்சி: 23.09 லட்சம் பயணிகள்.
மதுரை: 21.65 லட்சம் பயணிகள் (இரண்டாம் இடம்).
தூத்துக்குடி: 21.10 லட்சம் பயணிகள் (மூன்றாம் இடம்).
இதனைத் தொடர்ந்து ராமநாதபுரம் (ராமேஸ்வரம்) 20.16 லட்சம் பயணிகளுடன் நான்காம் இடத்தைப் பிடித்துள்ளது.
வெளிநாட்டுப் பயணிகளின் தேர்வு மதுரை: மொத்தப் பயணிகள் வருகையில் திருச்சி முதலிடம் பிடித்தாலும், வெளிநாட்டுச் சுற்றுலாப் பயணிகளை ஈர்ப்பதில் மதுரை மாவட்டம் முதலிடம் வகிக்கிறது. மதுரைக்கு 1.53 லட்சம் வெளிநாட்டினர் வருகை தந்துள்ளனர். இந்தப் பட்டியலில் திருச்சி இரண்டாம் இடத்தைப் பிடித்திருந்தாலும், ராமநாதபுரம் மாவட்டம் வெறும் 3,501 வெளிநாட்டினரை மட்டுமே ஈர்த்துப் பின்தங்கியுள்ளது.
திருச்சியின் வெற்றிக்குக் காரணம் என்ன? பாரம்பரியம், பக்தி மற்றும் வரலாறு ஆகியவற்றின் தனித்துவமான கலவையே திருச்சியின் இந்தச் சாதனைக்குக் காரணமாகும். குறிப்பாக ஸ்ரீ ரங்கநாதசுவாமி கோயில் (ஸ்ரீரங்கம்), சமயபுரம் மாரியம்மன் கோயில் மற்றும் மலைக்கோட்டை உச்சிப் பிள்ளையார் கோயில் ஆகியவை ஆன்மீக பக்தர்களை மட்டுமல்லாமல், வரலாற்று ஆர்வலர்களையும் காந்தம் போல ஈர்க்கின்றன.