காதலர் தினத்தை முன்னிட்டு ‘உயிருள்ளவரை உஷா’ உள்ளிட்ட கிளாசிக் படங்கள் ரீ-ரிலீஸ் செய்யப்பட்டுள்ள நிலையில், ‘வித் லவ்’ புதிய படமும் ரசிகர்களிடையே வரவேற்பைப் பெற்றுள்ளது.
நாளை (பிப்ரவரி 14) காதலர் தினம் கொண்டாடப்படுவதை முன்னிட்டு, தமிழ் திரையுலகில் பல கிளாசிக் காதல் திரைப்படங்கள் திரையரங்குகளில் மறுவெளியீடு செய்யப்பட்டுள்ளன. அந்த வகையில், கடந்த 1983-ம் ஆண்டு வெளியாகி மாபெரும் வெற்றி பெற்ற நடிகர் டி. ராஜேந்தரின் “உயிருள்ளவரை உஷா” திரைப்படம், அவர் இசையமைப்பிலேயே 43 ஆண்டுகளுக்குப் பிறகு இன்று மீண்டும் ரிலீஸ் ஆகியுள்ளது. இதேபோல், கவுதம் மேனன் இயக்கத்தில் மாதவன் நடித்த ‘மின்னலே’ மற்றும் அமீர் இயக்கத்தில் சூர்யா நடித்த ‘மௌனம் பேசியதே’ ஆகிய படங்களும் காதலர் தினத்தை முன்னிட்டு மீண்டும் திரைக்கு வந்துள்ளன.
மேலும், நாளை பிப்ரவரி 14 அன்று தமிழ் சினிமாவின் எவர்கிரீன் காதல் படமான ‘காதலர் தினம்’ திரைப்படமும் மறுவெளியீடு செய்யப்பட உள்ளது. அஜித்தின் ‘வீரம்’ மற்றும் சிம்புவின் ‘சிலம்பாட்டம்’ ஆகிய படங்கள் தற்போது திரையரங்குகளில் ஓடிக்கொண்டிருக்கும் நிலையில், புதிய படங்களைப் பொறுத்தவரை தற்போது திரையரங்குகளில் வெளியாகியுள்ள ‘வித் லவ்’ (With Love) திரைப்படம் ரசிகர்களிடையே நல்ல வரவேற்பைப் பெற்று வெற்றிகரமாக ஓடிக்கொண்டுள்ளது. அத்துடன் இன்று புதிய வரவுகளாக ‘மயிலாஞ்சி’ மற்றும் விஜய் ஆண்டனி தயாரிப்பில் உருவான ‘பூக்கி’ ஆகிய காதல் திரைப்படங்களும் திரையரங்குகளை அலங்கரிக்கின்றன.