சென்னையில் தங்கம் விலை சரிவு..பிப்ரவரி மாத நிலவரம்!

வரலாற்று உச்சத்திலிருந்து அதிரடியாகச் சரிந்த தங்கம் விலை, கடந்த இரண்டு வாரங்களாகத் தொடர்ந்து ஏற்ற இறக்கங்களைச் சந்தித்து வருவது நகை வாங்குவோரிடையே பெரும் எதிர்பார்ப்பை ஏற்படுத்தியுள்ளது.

தமிழகத்தில் கடந்த இரண்டு வாரங்களுக்கும் மேலாக ஆபரணத் தங்கத்தின் விலை பெரும் ஏற்ற இறக்கங்களைச் சந்தித்து வருவது பொதுமக்களிடையே பெரும் விவாதத்தை ஏற்படுத்தியுள்ளது. குறிப்பாக, கடந்த மாதம் 29-ஆம் தேதி சென்னையில் தங்கம் வரலாற்று உச்சமாக ரூ.1,34,400-க்கு விற்பனையாகி அதிர்ச்சி கொடுத்தது.

அந்த உச்சத்தைத் தொட்ட பிறகு தங்கம் விலை மளமளவெனக் குறையத் தொடங்கியது. உச்ச விலையில் இருந்து சுமார் ரூ.20,000 வரை சரிந்து, கடந்த பிப்ரவரி 2-ஆம் தேதி ஒரு சவரன் தங்கம் ரூ.1,11,600 என்ற நிலைக்குக் கீழ் இறங்கியது. இந்தத் திடீர் சரிவு நகை வாங்குவோருக்குச் சற்று நிம்மதியை அளித்தாலும், அடுத்தடுத்த நாட்களில் விலை மீண்டும் நிலையற்ற தன்மையுடன் காணப்பட்டது.

தொடர்ந்து வந்த நாட்களில் தங்கம் விலை ஊசலாட்டத்துடனேயே நீடித்தது. பிப்ரவரி 3-ஆம் தேதி ரூ.1,14,160 ஆக உயர்ந்த தங்கம், பிப்ரவரி 4-ஆம் தேதி மீண்டும் அதிரடியாக அதிகரித்து ரூ.1,19,200–ஐ எட்டியது. எனினும், இந்த உயர்வு நீடிக்காமல் பிப்ரவரி 5-ஆம் தேதி ரூ.1,14,560 ஆகவும், பிப்ரவரி 6-ஆம் தேதி ரூ.1,14,000 ஆகவும் மீண்டும் குறைந்தது.

சர்வதேச சந்தையில் நிலவும் பொருளாதார மாற்றங்கள் மற்றும் டாலரின் மதிப்பு உள்ளிட்ட பல்வேறு காரணங்களால், சென்னையில் தங்கம் விலை ஒரு சீரான நிலையின்றி தினசரி மாற்றங்களைக் கண்டு வருகிறது. திருமண சீசன் நெருங்கும் வேளையில், தங்கத்தின் இந்த அதிரடி விலை மாற்றங்களை இல்லத்தரசிகளும் முதலீட்டாளர்களும் உன்னிப்பாகக் கவனித்து வருகின்றனர்.