2026 ஆங்கிலப் புத்தாண்டை முன்னிட்டு சென்னையில் பொதுமக்கள் பாதுகாப்பாகவும், அமைதியாகவும் கொண்டாட்டங்களில் ஈடுபடுவதை உறுதி செய்யும் வகையில் மாநகரக் காவல்துறை பல்வேறு கடுமையான கட்டுப்பாடுகளை விதித்துள்ளது. இன்று இரவு முதல் அமலுக்கு வரும் இந்த விதிமுறைகளின்படி, சென்னை மெரினா, சாந்தோம், பெசன்ட் நகர் மற்றும் நீலாங்கரை உள்ளிட்ட முக்கிய கடற்கரைப் பகுதிகளில் பொதுமக்கள் கடலில் இறங்கவோ அல்லது குளிக்கவோ அனுமதி மறுக்கப்பட்டுள்ளது. இன்றும் நாளையும் கடற்கரை மணல் பரப்பு மற்றும் நீர் நிலைகளுக்கு அருகே செல்ல வேண்டாம் எனப் பொதுமக்கள் அறிவுறுத்தப்பட்டுள்ளனர். மேலும், பொது இடங்கள் மற்றும் குடியிருப்புப் பகுதிகளில் பட்டாசுகளை வெடிக்கத் தடை விதிக்கப்பட்டுள்ளதுடன், அடுக்குமாடி குடியிருப்புகளில் ஒலிப்பெருக்கிகளைப் பயன்படுத்த உரிய அனுமதி பெறுவது கட்டாயமாக்கப்பட்டுள்ளது.
பொதுமக்களின் பாதுகாப்பு மற்றும் போக்குவரத்தைச் சீர்செய்யும் நோக்கில், இன்று இரவு 9 மணி முதல் சென்னை மாநகரம் முழுவதும் தீவிரக் கண்காணிப்பு வளையத்திற்குள் கொண்டு வரப்பட உள்ளது. குறிப்பாக, குடிபோதையில் வாகனம் ஓட்டுபவர்களைக் கண்டறிய நகரின் 425 முக்கிய இடங்களில் வாகன தணிக்கைக் குழுக்கள் அமைக்கப்பட்டுள்ளன. மது அருந்த அனுமதிக்கப்பட்ட இடங்களுக்குக் குழந்தைகளை அழைத்துச் செல்லக் கூடாது என்ற முக்கிய கட்டுப்பாட்டையும் காவல்துறை விதித்துள்ளது. புத்தாண்டு இரவு மது அருந்திவிட்டு வாகனம் ஓட்டுபவர்கள் மீது கடும் நடவடிக்கை எடுக்கப்படும் என்றும், தேவைப்பட்டால் வாகனங்கள் பறிமுதல் செய்யப்படும் என்றும் எச்சரிக்கப்பட்டுள்ளது.
பைக் ரேஸ் போன்ற ஆபத்தான செயல்களைத் தடுப்பதற்காகக் காவல்துறை கூடுதல் கவனம் செலுத்தி வருகிறது. கிண்டி, அடையாறு, தரமணி, நீலாங்கரை, துரைப்பாக்கம், மதுரவாயல் பைபாஸ் சாலை மற்றும் ஜிஎஸ்டி சாலை போன்ற பகுதிகளில் பைக் ரேஸைத் தடுக்க 30 சிறப்புப் பறக்கும் படைகள் அமைக்கப்பட்டுள்ளன. இளைஞர்கள் தங்கள் உயிரைப் பணயம் வைத்துச் சாலைகளில் ஆபத்தான சாகசங்களில் ஈடுபடுவதைத் தவிர்க்குமாறு பெற்றோர்களும் கேட்டுக் கொள்ளப்பட்டுள்ளனர். இத்தகைய விரிவான பாதுகாப்பு ஏற்பாடுகள் மூலம் புத்தாண்டு கொண்டாட்டங்கள் எவ்வித அசம்பாவிதங்களும் இன்றி நடைபெறுவதை உறுதி செய்யச் சென்னை மாநகரக் காவல்துறை முழு வீச்சில் தயாராக உள்ளது.