ஹிப் ஹாப் தமிழா ஆதியின் பிறந்தநாள் பரிசாக, ‘மீசைய முறுக்கு 2’ திரைப்படத்தின் அறிவிப்பு மற்றும் ரிவீல் டீசர் இன்று வெளியாகிறது.
2017-ஆம் ஆண்டில் இளைஞர்களின் மனதைக் கவர்ந்த ‘மீசைய முறுக்கு’ திரைப்படத்தின் அடுத்த பாகம் தற்போது விறுவிறுப்பாகத் தயாராகி வருகிறது. ஹிப் ஹாப் ஆதி இயக்கம் மற்றும் நடிப்பில் வெளியான இப்படத்தின் முதல் பகுதி, ரசிகர்களிடையே அமோக வரவேற்பைப் பெற்றது. குறிப்பாக, கல்லூரி மாணவர்களின் லட்சியம் மற்றும் காதலை யதார்த்தமாகப் பேசியதால் இது ரசிகர்களின் ஆல்-டைம் ஃபேவரைட் படமாக அமைந்தது.
இந்நிலையில், ரசிகர்களின் நீண்ட கால எதிர்பார்ப்பைப் பூர்த்தி செய்யும் விதமாக ‘மீசைய முறுக்கு 2’ குறித்த அறிவிப்பை ஆதி வெளியிட்டுள்ளார். “அவ்னி சினிமாக்ஸ்” சார்பில் சுந்தர் சி மற்றும் குஷ்பு ஆகிய இருவரும் இணைந்து இந்தப் படத்தைப் பிரம்மாண்டமாகத் தயாரிக்கின்றனர். இன்று (பிப். 20) ஆதி தனது பிறந்தநாளைக் கொண்டாடும் வேளையில், ரசிகர்களுக்குப் பரிசாக இன்று மாலை இப்படத்தின் ‘ரிவீல் டீசர்’ (Reveal Teaser) வெளியாகிறது. முந்தைய பாகத்தின் வெற்றியைத் தொடர்ந்து, இப்படத்திற்கும் ஆதியே கதை, திரைக்கதை மற்றும் வசனம் எழுதி இயக்குநராகப் பொறுப்பேற்றுள்ளார்.